ఏఐ సైబర్‌ దాడులకు చెక్‌ పెట్టేలా రుబ్రిక్‌ కొత్త టూల్‌..

కృత్రిమ మేధస్సు (ఏఐ) ఆధారిత ఏజెంట్లు సాఫ్ట్‌వేర్‌ లోపాలను గుర్తించి వాటిని దుర్వినియోగం చేసే సామర్థ్యాన్ని పెంచుకుంటున్న నేపథ్యంలో సైబర్‌ భద్రతకు ప్రాధాన్యం పెరుగుతోంది. అక్టోబర్‌ 15న భారత కంప్యూటర్‌ ఎమర్జెన్సీ రెస్పాన్స్‌ టీమ్‌ (CERT-In) హెచ్చరించినట్లు వచ్చిన నివేదిక ప్రకారం, తగినంత పరీక్షలు చేయని ఏఐ ఏజెంట్లు కొన్ని భారతీయ సంస్థల లైవ్‌ సిస్టమ్‌లలోకి అనధికారికంగా ప్రవేశించాయి. బహిర్గతమైన లాగిన్‌ వివరాలు, బహిరంగంగా అందుబాటులో ఉన్న కోడ్‌ రిపాజిటరీలు, అతిగా అనుమతులు కల్పించిన క్లౌడ్‌ సెట్టింగ్‌లు ఇందుకు కారణాలుగా పేర్కొన్నారు. ఈ నేపథ్యంలో సైబర్‌ భద్రతా సంస్థ రుబ్రిక్‌ Code Guardian పేరుతో ఏఐ ఆధారిత కోడ్‌ వల్నరబిలిటీ స్కానర్‌ను పరిచయం చేసింది. Anthropicకు చెందిన Claude Mythos సాంకేతికతను ఉపయోగిస్తూ Project Glasswing కార్యక్రమంలో భాగంగా రూపొందించిన ఈ టూల్‌.. హ్యాకర్లు దుర్వినియోగం చేయకముందే సాఫ్ట్‌వేర్‌లోని కీలక భద్రతా లోపాలను గుర్తించడమే లక్ష్యంగా పనిచేస్తుంది.

గోవాలో జరిగిన Rubrik GSI Summit 2026 సందర్భంగా ది ఇండియన్‌ ఎక్స్‌ప్రెస్‌తో మాట్లాడిన సంస్థ చీఫ్‌ ప్రొడక్ట్‌ ఆఫీసర్‌ అన్నేకా గుప్తా, చీఫ్‌ సొల్యూషన్స్‌ ఆఫీసర్‌ అలోక్‌ అగర్వాల్‌ ఈ టూల్‌ పనితీరుపై వివరించారు. కస్టమర్ల అసలు రిపాజిటరీలు లేదా లైవ్‌ ప్రొడక్షన్‌ కోడ్‌ను నేరుగా మార్చకుండా, కోడ్‌ కాపీని ప్రత్యేకంగా వేరుచేసిన భద్రతా వాతావరణంలో స్కాన్‌ చేసే విధంగా Code Guardianను రూపొందించినట్లు గుప్తా తెలిపారు. అధునాతన ఏఐ భద్రతా పరీక్షల అవసరం టెక్నాలజీ రంగానికే పరిమితం కాకుండా రిటైల్‌ వంటి ఇతర రంగాలకూ విస్తరిస్తోందని అగర్వాల్‌ పేర్కొన్నారు. రుబ్రిక్‌ పరిశోధన, అభివృద్ధి (R&D) కార్యకలాపాల్లో సుమారు 60 శాతం భారత్‌లోనే జరుగుతున్నాయని గుప్తా వెల్లడించారు. బెంగళూరు, పుణె కార్యాలయాలు సంస్థ వినూత్న ఉత్పత్తుల అభివృద్ధిలో కీలక పాత్ర పోషిస్తున్నాయని తెలిపారు. భవిష్యత్తులో ఒకే ఏఐ మోడల్‌పై ఆధారపడకుండా బహుళ మోడళ్లతో పనిచేసే విధానాన్ని అనుసరించాలని సంస్థ భావిస్తోంది.