ఎంటర్‌ప్రైజ్‌ల కోసం మైక్రోసాఫ్ట్ Agent 365 విడుదల

మైక్రోసాఫ్ట్ తాజాగా నిర్వహించిన Ignite 2025 ఈవెంట్‌లో సంస్థ Microsoft Agent 365 ను పరిచయం చేసింది. సంస్థ అంతటా పనిచేస్తున్న కృత్రిమ మేధస్సు (AI) ఏజెంట్లను గుర్తించడానికి, నియంత్రించడానికి, పర్యవేక్షించడానికి ఉపయోగపడే ఒకే ప్లాట్‌ఫార్మ్‌గా దీన్ని రూపొందించారు. మైక్రోసాఫ్ట్ 365 అడ్మిన్ సెంటర్‌లో Frontier ప్రీవ్యూ కార్యక్రమం ద్వారా ఇది ఇప్పటికే అందుబాటులో ఉంది.

సంస్థలలో AI ఆధారిత టాస్కులు పెరుగుతున్న నేపథ్యంలో, ఏ ఏజెంట్ ఎక్కడ ఉపయోగంలో ఉన్నదీ, అది ఏ సమాచారాన్ని యాక్సెస్ చేస్తుందీ, రియల్‌ టైమ్‌లో ఎలా పనిచేస్తుందీ తెలుసుకోవాల్సిన అవసరం పెరిగింది. ఈ అవసరాన్ని తీర్చే విధంగా Agent 365‌ ను మైక్రోసాఫ్ట్ రూపొందించింది.

Agent 365 లో ప్రధాన పాత్ర పోషించేది క్రొత్త సెంట్రల్ రిజిస్ట్రీ. ఇందులో ప్రతి AI ఏజెంట్‌కు సంబంధించిన వివరాలు నమోదు చేయవచ్చు  దానిని ఎవరు సృష్టించారు, ఏ పనుల కోసం డిజైన్ చేశారు, సంస్థలో ఏ డేటాను యాక్సెస్ చేయగలదు వంటి కీలక సమాచారం అందుబాటులో ఉంటుంది. దీని ద్వారా అవసరం లేని ఏజెంట్లను గుర్తించడం, లేదా అనుమతులను సవరించడం సులభం అవుతుంది.

ప్లాట్‌ఫార్మ్‌లో రియల్‌టైమ్ మానిటరింగ్ కూడా ఉంది. ఏ ఏజెంట్ ఎప్పుడు యాక్టివ్ అయిందీ, అది ఎలాంటి సర్వీసులను యాక్సెస్ చేసిందీ, ఏవైనా అనుమానాస్పద చర్యలు ఉన్నాయో లేదో అడ్మిన్లు వెంటనే తెలుసుకోవచ్చు. ఒక ఏజెంట్ అనవసరమైన ఫైళ్లను యాక్సెస్ చేస్తే, అది ముందుగానే గుర్తించే అవకాశం ఉంటుంది.

Agent 365 లో ప్రతి AI ఏజెంట్‌కూ మైక్రోసాఫ్ట్ Entra ద్వారా ప్రత్యేక డిజిటల్ ఐడెంటిటీ ఇవ్వబడుతుంది. ఇది ఉద్యోగికి ఐడి కార్డు ఇచ్చినట్లే. ఈ ఐడెంటిటీతో ఏజెంట్‌కు అనుమతులను ఇవ్వడం, సున్నితమైన సమాచారానికి యాక్సెస్‌ను పరిమితం చేయడం, చేసిన చర్యలను ఆడిట్ చేయడం సాధ్యం అవుతుంది.

మైక్రోసాఫ్ట్ యాప్‌లు సంస్థలలో విస్తృతంగా ఉపయోగంలో ఉన్నందున, Agent 365 ద్వారా Outlook, Word, Excel, Power Apps, Power BI వంటి యాప్‌లతో నేరుగా కనెక్ట్ అయ్యే వీలు ఉంటుంది. దీంతో ఏజెంట్లు ఈ యాప్‌లలో టాస్కులు నిర్వహించినప్పటికీ, బ్యాక్‌ఎండ్‌లో ఏమి జరుగుతుందో ఐటీ టీమ్స్‌కు స్పష్టంగా తెలుస్తుంది.