ఏఐ ఉపయోగకరమా లేదా భయానకమా ?

ఆంత్రోపిక్ గురువారం ‘ఇంటర్వ్యూవర్’ అనే కొత్త ఏఐ టూల్‌ను విడుదల చేసినట్లు ప్రకటించింది. ఇది సాధారణ వినియోగదారుల కోసం కాకుండా, వారు ఏఐను ఎలా ఉపయోగిస్తున్నారు, దానిపై వారి అభిప్రాయాలు ఏమిటనే అంశాన్ని తెలుసుకునేందుకు ప్రత్యేకంగా రూపొందించబడింది. క్లాడ్‌లో వారం రోజుల పాటు నిర్వహించే పైలట్ ప్రాజెక్ట్‌గా ఈ టూల్ అందుబాటులోకి వస్తుంది. కొంతమంది వినియోగదారులకు పాప్-అప్ రూపంలో కనిపించే ఈ ఇంటర్వ్యూవర్, వారి అనుభవాలను అడిగి తెలుసుకుంటుంది. సేకరించిన సమాచారం ప్రజలతో పంచుకుంటామని కంపెనీ తెలిపింది.

ఆంత్రోపిక్ సొంత భాషా మోడల్ అయిన క్లాడ్ ఆధారంగా పనిచేసే ఈ టూల్ మూడు దశల్లో పనిచేస్తుంది — ప్రణాళిక, ఇంటర్వ్యూ మరియు విశ్లేషణ. ఇది ప్రశ్నలను ఆటోమేటిక్‌గా రూపొందించడం, సంభాషణ జరపడం, సమాధానాలను సమీకరించి విశ్లేషించడం వంటి పనులు చేస్తుంది. ఇప్పటికే 1,250 మంది వృత్తి రంగాల నిపుణులతో దీనిని పరీక్షించారు. ఎక్కువ మంది ఏఐ తమ సమయాన్ని ఆదా చేస్తుందని పేర్కొనగా, కొంతమంది ఉద్యోగ భద్రత, డేటా భద్రత మరియు అత్యంత ముఖ్యమైన పనుల్లో ఏఐపై ఆధారపడటంపై ఆందోళన వ్యక్తం చేశారు.