జెమినీలో “ఇంపోర్ట్ ఏఐ చాట్స్” ఫీచర్ త్వరలో?

ఇతర ఏఐ చాట్‌బాట్‌ల నుంచి జెమినీకి మారడం సులభం చేయడానికి గూగుల్ ఒక కొత్త ఫీచర్‌ను పరీక్షిస్తోంది. “ఇంపోర్ట్ ఏఐ చాట్స్” అనే ఈ ఫీచర్ ద్వారా ChatGPT, Claude, Grok వంటి ప్లాట్‌ఫామ్‌లలో ఉన్న మొత్తం చాట్ హిస్టరీని జెమినీకి మార్చుకునే అవకాశం ఉంటుంది. దీని వల్ల యూజర్లు ఇప్పటికే చేస్తున్న పనులను కోల్పోకుండా, కొత్తగా జెమినీకి తమ అభిరుచులు వివరించాల్సిన అవసరం లేకుండా సులభంగా మారవచ్చు.

ఈ ఫీచర్ ప్రస్తుతం జెమినీ వెబ్ వెర్షన్‌లో బీటా రూపంలో కనిపించిందని సమాచారం. టెక్స్ట్ బాక్స్ కింద ఉన్న అటాచ్‌మెంట్స్ ఐకాన్‌లో ఈ ఆప్షన్ ఉండగా, ఇతర ఏఐ ప్లాట్‌ఫామ్‌ల నుంచి చాట్ హిస్టరీని డౌన్‌లోడ్ చేసి జెమినీకి అప్‌లోడ్ చేసే విధానాన్ని సూచనల రూపంలో చూపిస్తోంది. అయితే, దిగుమతి చేసిన డేటాను జెమినీ ఎలా మెమరీగా ఉపయోగిస్తుంది, ఇప్పటికే ఉన్న సెట్టింగ్స్ లేదా అభిరుచులతో ఏవైనా సమస్యలు వస్తాయా అనే విషయాలపై ఇంకా స్పష్టత లేదు.