గూగుల్ మ్యాప్స్ లో జెమినీ ఆధారిత ఏఐ ఎడిటింగ్ ఫీచర్

గూగుల్ మ్యాప్స్ లో లిస్టింగ్‌లను సవరించడం మరింత సులభంగా మారనుంది. తాజా సమాచారం ప్రకారం, గూగుల్ తన “సజెస్ట్ అన్ ఎడిట్” ఫీచర్‌ను  జెమినీ ఏఐతో అనుసంధానించేందుకు పనిచేస్తోంది. ఈ అప్‌డేట్ ద్వారా యూజర్లకు చాట్‌బాట్ తరహా ఇంటర్‌ఫేస్ అందుబాటులోకి వచ్చి, షాపులు లేదా ప్రదేశాల వివరాలను సహజ భాషలో చెప్పి సవరించుకునే అవకాశం కలగనుంది.

ప్రస్తుతం గూగుల్ మ్యాప్స్ లో సమాచారం సవరించాలంటే పలు దశల ద్వారా మాన్యువల్‌గా వివరాలు నమోదు చేయాల్సి ఉంటుంది. దీని వల్ల కొన్ని సార్లు తప్పులు జరిగే అవకాశం ఉంటుంది.  మ్యాప్స్ ప్లాట్‌ఫామ్ క్రౌడ్‌సోర్స్‌డ్ డేటాపై ఆధారపడటంతో, ఈ ప్రక్రియను సులభతరం చేయాలని గూగుల్ భావిస్తోంది. జెమినీ ఏఐ ద్వారా యూజర్లు నేరుగా తమ మార్పులను టైప్ చేస్తే, వాటి ఉద్దేశ్యాన్ని అర్థం చేసుకుని సరిగా అమలు చేసే అవకాశం ఉంటుంది.

ఆండ్రాయిడ్ అథారిటీ చేసిన ఏపీకే టియర్‌డౌన్‌లో గూగుల్ మ్యాప్స్ 26.05.04.860829830 వెర్షన్‌లో ఈ ఫీచర్ కనిపించినట్లు సమాచారం. ప్రస్తుతం ఇది యూజర్లకు అందుబాటులో లేదు. ఇప్పటికే వాకింగ్, సైక్లింగ్ నావిగేషన్‌లకు జెమినీ వాయిస్ అసిస్టెన్స్‌ను తీసుకొచ్చిన గూగుల్, ఇప్పుడు ఎడిటింగ్ టూల్‌ను కూడా ఏఐ ఆధారంగా మెరుగుపరచాలని చూస్తోంది.