ఏఐ, చాట్‌జిపిటి ని ఈ విషయాలు అడగొద్దు అంటున్న నిపుణులు..

ఆధునిక ప్రపంచంలో ChatGPT, Grok, Gemini వంటి ఏఐ చాట్‌బాట్‌ల వినియోగం గణనీయంగా పెరిగింది. సాధారణ సమాచారం కోసం ఇవి ఉపయోగపడుతున్నప్పటికీ, కొన్ని అంశాల్లో వాటిని నమ్మడం ప్రమాదకరం. ముఖ్యంగా వైద్య సలహాలు లేదా చికిత్సల విషయంలో ఏఐపై ఆధారపడకూడదు. ఇవి వైద్యులు కావు కాబట్టి వ్యాధి నిర్ధారణ లేదా మందుల సూచనల్లో తప్పులు జరిగే అవకాశం ఉంది. అలాగే బ్యాంక్ వివరాలు, పాస్‌వర్డ్లు, ఓటీపీలు, ఆధార్ లేదా పాన్ నంబర్లు వంటి వ్యక్తిగత, ఆర్థిక సమాచారాన్ని ఏఐ చాట్‌బాట్‌లలో ఎప్పటికీ నమోదు చేయరాదు.

చట్టవిరుద్ధమైన పనులకు సంబంధించిన సలహాలు కోరడం కూడా ప్రమాదకరం. హ్యాకింగ్, మోసం, పన్నుల ఎగవేత వంటి అంశాల్లో ఏఐ ఎలాంటి సహాయాన్ని అందించదు. అంతేకాదు, ఏఐ సమాధానాలు పూర్తిగా నిజమనే భావన తప్పు. కొన్నిసార్లు అవి పాత లేదా తప్పు సమాచారాన్ని అందించవచ్చు. ఉద్యోగం వదులుకోవాలా, వ్యాపారం ప్రారంభించాలా వంటి కీలక నిర్ణయాల్లో ఏఐ అభిప్రాయాలను అనుసరించకుండా నిపుణుల సలహా తీసుకోవడం మంచిది. భావోద్వేగాల విషయంలో కూడా ఏఐకి నిజమైన సానుభూతి ఉండదని గుర్తించి, మద్దతు కోసం సన్నిహితులనే ఆశ్రయించాలి.