ఐఫోన్‌ 18 సిరీస్‌ వచ్చేసింది.. యాపిల్‌ తొలి ఫోల్డబుల్‌ ఫోన్‌ ‘డ్యూయో’ ప్రత్యేకతలివే!

అందరూ ఆసక్తిగా ఎదురుచూస్తున్న ఐఫోన్‌ 18 సిరీస్‌ను యాపిల్‌ ఆవిష్కరించింది. దీంతో పాటు సంస్థ తన తొలి ఫోల్డబుల్‌ స్మార్ట్‌ఫోన్‌ ఐఫోన్‌ డ్యూయోను కూడా పరిచయం చేసింది. కాలిఫోర్నియాలో నిర్వహించిన కార్యక్రమంలో యాపిల్‌ కొత్త సీఈఓ జాన్‌ టెర్నస్‌ తాజా ఉత్పత్తుల వివరాలను వెల్లడించారు. స్టార్‌ వైట్‌, నైట్‌ స్కై రంగుల్లో లభించే ఫోల్డబుల్‌ ఐఫోన్‌ మడత విప్పినప్పుడు అత్యంత పల్చటి ఐఫోన్‌గా నిలుస్తుందని సంస్థ తెలిపింది. ఇందులో 7.6 అంగుళాల సూపర్‌ రెటీనా ఎక్స్‌డీఆర్‌ డిస్‌ప్లే ఉంటుంది. రెండు హోమ్‌ స్క్రీన్‌ పేజీలు, మెయిల్‌, మెసేజెస్‌ వంటి యాప్‌లను పక్కపక్కనే వినియోగించుకునే సదుపాయం ఉంది. మడతపెట్టినప్పుడు 5.4 అంగుళాల డిస్‌ప్లేను క్లాక్‌, వెదర్‌, క్యాలెండర్‌, మ్యూజిక్‌ వంటి విడ్జెట్ల కోసం ఉపయోగించుకోవచ్చు. ఫోల్డబుల్‌ డిజైన్‌కు అనుగుణంగా ఐఓఎస్‌ 27ను కూడా రీడిజైన్‌ చేశారు.

ఐఫోన్‌ 18 ప్రో, 18 ప్రో మ్యాక్స్‌ మోడళ్లు 256జీబీ నుంచి 2టీబీ వరకు స్టోరేజీ ఆప్షన్లలో అందుబాటులోకి రానున్నాయి. డీప్‌ బ్లాక్‌, సిల్వర్‌, గ్లేసియర్‌ బ్లూ, కొత్త బర్గుండీ రంగుల్లో వీటిని తీసుకొచ్చారు. ఏ20 ప్రో చిప్‌తో పాటు ఏఐ ఆధారిత సిరి, యాపిల్‌ ఇంటెలిజెన్స్‌ వంటి ఫీచర్లు ఉన్నాయి. 48ఎంపీ ఫ్యూజన్‌ మెయిన్‌ కెమెరాలో ఆస్ట్రోఫొటోగ్రఫీ, నైట్‌ మోడ్‌ మెరుగుపడ్డాయి. 4కే డాల్బీ విజన్‌ హెచ్‌డీఆర్‌ టైమ్‌ల్యాప్స్‌, ప్రొ కంట్రోల్స్‌ వంటి ఫీచర్లు కూడా ఉన్నాయి. 6.9 అంగుళాల డిస్‌ప్లేతో వచ్చే ఐఫోన్‌ 18 ప్రో మ్యాక్స్‌లో ప్రో మోడల్‌ ఫీచర్లతో పాటు మెరుగైన బ్యాటరీ సామర్థ్యం లభిస్తుంది. వీటితో పాటు ఓపెన్‌-ఇయర్‌ డిజైన్‌, మెరుగైన నాయిస్‌ రిడక్షన్‌, లైవ్‌ ట్రాన్స్‌లేషన్‌ వంటి ఫీచర్లతో ఎయిర్‌పాడ్స్‌ 5, అప్‌గ్రేడ్‌ చేసిన హెల్త్‌ సెన్సర్లు, ఏఐ ఆధారిత ఆడియో ఫీచర్లతో యాపిల్‌ వాచ్‌ సిరీస్‌ 12, యాపిల్‌ వాచ్‌ అల్ట్రా 4లను కూడా సంస్థ పరిచయం చేసింది.