స్మార్ట్ సిరి, ఏఐ ఫీచర్లతో iOS 27 ఆవిష్కరణకు ఆపిల్ సిద్ధం

ఆపిల్ తన వార్షిక డెవలపర్స్ సదస్సు WWDC 2026లో iOS 27ను ఆవిష్కరించేందుకు సిద్ధమవుతోంది. ఈసారి ప్రధాన దృష్టి ఏఐ ఆధారిత ఫీచర్లపైనే ఉండనుంది. కొత్త iOS వెర్షన్‌లో మరింత తెలివైన సిరి, మెరుగైన బ్యాటరీ పనితీరు, వేగవంతమైన స్పందన, వ్యక్తిగత అవసరాలకు అనుగుణమైన ఏఐ సేవలు అందుబాటులోకి వచ్చే అవకాశం ఉంది. సిరి గత సంభాషణలను గుర్తుంచుకోవడం, మెరుగైన సెర్చ్ అనుభవం అందించడం, ప్రత్యేక చాట్‌బాట్ యాప్ రూపంలో పనిచేయడం వంటి ఫీచర్లు రానున్నట్లు సమాచారం.

ఆపిల్ తొలి ఫోల్డబుల్ ఐఫోన్‌ను దృష్టిలో ఉంచుకొని iOS 27ను రూపొందించినట్లు నివేదికలు సూచిస్తున్నాయి. స్ప్లిట్ స్క్రీన్ మల్టీటాస్కింగ్, ఏఐ ఆధారిత రైటింగ్ టూల్స్, గ్రామర్ చెకింగ్, సహజ భాషలో షార్ట్‌కట్స్ సృష్టించడం, కస్టమ్ వాల్‌పేపర్లు, మెరుగైన ఫోటో ఎడిటింగ్ ఫీచర్లు, కస్టమైజ్ చేయగల కెమెరా యాప్ వంటి అనేక కొత్త సౌకర్యాలు అందుబాటులోకి రానున్నాయి. WWDC అనంతరం డెవలపర్ బీటా విడుదల కాగా, సెప్టెంబర్ 2026లో పూర్తి వెర్షన్ అందుబాటులోకి వచ్చే అవకాశం ఉంది.