గూగుల్ నుంచి అదిరే అవకాశం.. ఉచితంగా 3,000కి పైగా ఏఐ, టెక్ కోర్సులు

ప్రస్తుతం ప్రపంచవ్యాప్తంగా ఆర్టిఫిషియల్ ఇంటెలిజెన్స్ (ఏఐ) హవా కొనసాగుతోంది. బ్యాంకింగ్, ఫైనాన్స్, సాఫ్ట్‌వేర్, మీడియా వంటి ప్రతి రంగంలోనూ ఏఐ కీలకంగా మారింది. ఈ నేపథ్యంలో భారతీయ విద్యార్థులు, యువత కోసం గూగుల్ భారీ ఆఫర్ ప్రకటించింది. ఏకంగా 3,000కి పైగా ఏఐ, టెక్నాలజీ కోర్సులను పూర్తిగా ఉచితంగా అందిస్తోంది. ఈ కోర్సులు ఈ ఏడాదిలో గూగుల్ ఇచ్చిన అతిపెద్ద ఏఐ అవకాశాల్లో ఒకటిగా భావిస్తున్నారు.

ఈ కోర్సులు సాధారణ ఆన్‌లైన్ లెర్నింగ్ కాకుండా, గూగుల్‌లోనే ఏఐ, క్లౌడ్ ఇన్‌ఫ్రాస్ట్రక్చర్ వంటి టెక్నాలజీలను అభివృద్ధి చేసిన నిపుణుల చేత రూపొందించబడ్డాయి. డెలాయిట్, యాక్సెంచర్ సహా 150కి పైగా ప్రముఖ కంపెనీలు గుర్తించే సర్టిఫికేషన్లు ఇవి. బిగినర్ సర్టిఫికేట్లు, స్కిల్ బ్యాడ్జ్‌లు, గూగుల్ క్లౌడ్ సర్టిఫికేషన్లు అనే మూడు స్థాయిల్లో కోర్సులు అందుబాటులో ఉన్నాయి. ముఖ్యంగా ఏఐ, డేటా, క్లౌడ్, ఆటోమేషన్ వంటి రంగాల్లో ఉద్యోగ అవకాశాలు కోరుకునేవారికి ఇవి ఎంతో ఉపయోగపడనున్నాయి. అదనంగా ప్రతి నెలా ఉచిత క్లౌడ్ క్రెడిట్స్ కూడా లభిస్తాయి.