5 వరల్డ్ రికార్డులకు చేరువ లో హిట్ మ్యాన్, సౌత్ ఆఫ్రికా వన్డే సిరీస్ ఫై అభిమానుల ఆసక్తి

హిట్‌ మ్యాన్ రోహిత్ శర్మ మరోసారి మైదానం లోకి దిగడానికి సిద్ధమవుతున్నాడు. నవంబర్ 30 నుంచి ప్రారంభమయ్యే సౌతాఫ్రికా వన్డే సిరీస్‌లో ఓపెనర్‌ గా తన స్వంత శైలిలో మెరిసేందుకు రోహిత్ సిద్ధంగా ఉన్నాడు. రాంచీలో ఇప్పటికే తీవ్రంగా ప్రాక్టీస్ చేసిన ఈ దిగ్గజం, ఆస్ట్రేలియాతో గత వన్డే సిరీస్‌ లా ఈ సిరీస్‌ లో కూడా మెరుపులు చిమ్మించే అవకాశం ఉంది. కేవలం మూడు మ్యాచ్‌ల ఈ సిరీస్ రోహిత్‌కు ప్రత్యేకంగా నిలవబోతుంది. ఎందుకంటే ఇక్కడే అతను 5 ముఖ్య ప్రపంచ రికార్డులు, 11 అద్భుత ఘనతలు సాధించే అవకాశం ఉంది!

టీమ్ ఇండియా మాజీ కెప్టెన్ రోహిత్ శర్మ ఈ సౌతాఫ్రికా వన్డే సిరీస్‌లో 5 ముఖ్య ప్రపంచ రికార్డులను అధిగమించే అవకాశం కలిగి ఉన్నాడు. ఈ సిరీస్‌ లో మరో 98 పరుగులు చేస్తే, అంతర్జాతీయ క్రికెట్‌లో 20,000 పరుగుల మైలురాయి చేరుకుని, ఈ ఘనత సాధించిన ఆటగాళ్ల జాబితాలో చేరతాడు. వన్డేల్లో అత్యధిక సిక్సర్లు (351) కొట్టిన పాకిస్తాన్ దిగ్గజం షాహిద్ అఫ్రిది రికార్డును బద్దలు కొట్టడానికి కేవలం 7 సిక్సర్లు మాత్రమే దూరం. ఓపెనర్‌గా 15,787 పరుగులు చేసిన రోహిత్, మరో 213 పరుగులు చేస్తే 16,000 పరుగుల మార్క్‌ను దాటనున్నాడు. ముఖ్యంగా, ఓపెనర్‌గా క్రిస్ గేల్ (338 సిక్సర్లు) రికార్డును అధిగమించడానికి 8 సిక్సర్లు, ఓపెనర్‌గా అత్యధిక వన్డే సెంచరీలు సాధించిన ఏకైక భారతీయుడిగా నిలవడానికి ఒక సెంచరీ మాత్రమే అవసరం.

ఈ సిరీస్‌లో రోహిత్ స్వదేశంలో సౌతాఫ్రికా పై అరుదైన ఘనతలు సాధించగలడు. సౌతాఫ్రికా పై మరో 27 పరుగులు చేస్తే, ఆ జట్టుపై 2,000 అంతర్జాతీయ పరుగులు పూర్తి చేస్తాడు. అలాగే, ఆ జట్టు పై అంతర్జాతీయ క్రికెట్‌ లో అత్యధిక సిక్సర్లు కొట్టిన రికార్డు కు మరో 7 సిక్సర్లు దూరంలో ఉన్నాడు. భారత గడ్డ పై వన్డేల్లో 5,000 పరుగులు పూర్తి చేయడానికి 133 పరుగులు అవసరం.  ఈ ఘనత సాధించిన మూడో భారతీయ ఆటగాడిగా మారతాడు.

హిట్‌మ్యాన్ జట్టు విజయాల్లో కూడా తన ముద్ర వేయబోతున్నాడు. భారత్ గెలిచిన అంతర్జాతీయ మ్యాచ్‌లలో 12,000 పరుగులు పూర్తి చేయడానికి కేవలం 30 పరుగులు దూరం. ఈ ఘనత సాధించిన తొలి ఆసియా ఓపెనర్‌ గా నిలుస్తాడు. అంతేకాకుండా, సౌతాఫ్రికా, ఇంగ్లండ్, న్యూజిలాండ్, ఆస్ట్రేలియా (SENA) దేశాల పై వన్డేల్లో 5,000 పరుగులు పూర్తి చేయడానికి 36 పరుగులు మాత్రమే అవసరం. ఈ రికార్డులు, ఘనతలు ఈ మూడు మ్యాచ్‌ల సిరీస్‌ను రోహిత్ శర్మకు చారిత్రక మైలురాయిగా మార్చనున్నాయి!