రంజీ ట్రోఫీలో హైదరాబాద్‌ ఘనవిజయం..

రంజీ ట్రోఫీలో ఆంధ్రతో జరిగిన మ్యాచ్‌లో హైదరాబాద్‌ జట్టు 267 పరుగుల భారీ తేడాతో విజయం సాధించింది. 398 పరుగుల లక్ష్య ఛేదనలో ఆంధ్ర రెండో ఇన్నింగ్స్‌లో 130 పరుగులకే ఆలౌటైంది. హైదరాబాద్‌ స్పిన్నర్‌ తనయ్‌ త్యాగరాజన్‌ 35 పరుగులిచ్చి ఆరు వికెట్లు పడగొట్టి ప్రత్యర్థి బ్యాటింగ్‌ పతనాన్ని శాసించాడు. బుధవారం 7/2తో ఆట కొనసాగించిన ఆంధ్రకు హేమంత్‌ రెడ్డి (27), రికీ భుయ్‌ (26) కొంతసేపు అండగా నిలిచారు. అయితే భుయ్‌ ఔటైన తర్వాత ఆంధ్ర వరుసగా వికెట్లు కోల్పోయింది. కేవీ శశికాంత్‌ 23 పరుగులతో పోరాడగా, అనికేత్‌ రెడ్డి మూడు వికెట్లు తీశాడు. తొలి ఇన్నింగ్స్‌లో హైదరాబాద్‌ 275 పరుగులు చేయగా, ఆంధ్ర 184 పరుగులకే పరిమితమైంది. రెండో ఇన్నింగ్స్‌ను హైదరాబాద్‌ 306/7 వద్ద డిక్లేర్‌ చేసింది. మ్యాచ్‌లో మొత్తం 11 వికెట్లు పడగొట్టడంతో పాటు అజేయ అర్ధశతకం (53) సాధించిన తనయ్‌ ప్లేయర్‌ ఆఫ్‌ ద మ్యాచ్‌గా నిలిచాడు.

మరో మ్యాచ్‌లో పంజాబ్‌ జట్టు ఛత్తీస్‌గఢ్‌పై ఏడు వికెట్ల తేడాతో విజయం సాధించింది. 86 పరుగుల లక్ష్యాన్ని కెప్టెన్‌ ఉదయ్‌ సహారన్‌ (40), ప్రభ్‌సిమ్రన్‌ సింగ్‌ (24) రాణించడంతో మూడు వికెట్లు కోల్పోయి ఛేదించింది. తొలి ఇన్నింగ్స్‌లో పంజాబ్‌ 456 పరుగులు చేయగా, ఛత్తీస్‌గఢ్‌ 206 పరుగులకే ఆలౌటై ఫాలోఆన్‌ ఆడింది. రెండో ఇన్నింగ్స్‌లో ఛత్తీస్‌గఢ్‌ 335 పరుగులకు ఆలౌటైంది. ఇక హిమాచల్‌ప్రదేశ్‌పై ముంబై ఇన్నింగ్స్‌ 97 పరుగుల తేడాతో ఘనవిజయం సాధించింది. తొలి ఇన్నింగ్స్‌లో హిమాచల్‌ 140 పరుగులు చేయగా, ముంబై 528/8 వద్ద డిక్లేర్‌ చేసింది. రెండో ఇన్నింగ్స్‌లో హిమాచల్‌ 291 పరుగులకే ఆలౌటైంది. ముంబై బౌలర్‌ మోహిత్‌ అవస్థి ప్రత్యర్థి బ్యాటర్లను కట్టడి చేయడంలో కీలక పాత్ర పోషించాడు.