టీ20 వరల్డ్‌ కప్‌ ఫైనల్‌కు న్యూజిలాండ్‌.. తొలి సెమీస్‌లో సౌతాఫ్రికాపై ఘన విజయం

T20 వరల్డ్ కప్ 2026 సెమీఫైనల్లో న్యూజిలాండ్ అద్భుత ప్రదర్శనతో సౌతాఫ్రికాపై 9 వికెట్ల తేడాతో ఘన విజయం సాధించింది. ముందుగా బ్యాటింగ్ చేసిన సౌతాఫ్రికా 20 ఓవర్లలో 8 వికెట్లకు 169 పరుగులు చేసింది. కెప్టెన్ ఐడెన్ మార్క్రమ్ 18, క్వింటన్ డీకాక్ 10 పరుగులు చేయగా ర్యాన్ రికెల్టన్ డక్ అవుట్ అయ్యాడు. డేవాల్డ్ బ్రెవిస్ 27 బంతుల్లో 34 పరుగులు, ట్రిస్టన్ స్టబ్స్ 24 బంతుల్లో 29 పరుగులు చేసి జట్టును నిలబెట్టే ప్రయత్నం చేశారు. చివర్లో మార్కో జాన్సెన్ 30 బంతుల్లో 55 పరుగులతో నాటౌట్‌గా నిలిచి సౌతాఫ్రికాకు పోటీ స్కోరు అందించాడు.

170 పరుగుల లక్ష్యంతో బరిలోకి దిగిన న్యూజిలాండ్ జట్టు మ్యాచ్‌ను పూర్తిగా ఏకపక్షంగా మార్చింది. టిమ్ సైఫర్ట్ 33 బంతుల్లో 58 పరుగులు చేసి మంచి ఆరంభం అందించాడు. మరోవైపు ఫిన్ అలెన్ చరిత్రాత్మక ఇన్నింగ్స్ ఆడి కేవలం 33 బంతుల్లోనే సెంచరీ సాధించాడు. అతని ఇన్నింగ్స్‌లో 10 ఫోర్లు, 8 సిక్సర్లు ఉన్నాయి. ఈ విధ్వంసకర బ్యాటింగ్‌తో న్యూజిలాండ్ కేవలం 12.5 ఓవర్లలోనే లక్ష్యాన్ని చేధించింది. ఈ మ్యాచ్‌లో సౌతాఫ్రికా చేసిన 169/8 పరుగులను న్యూజిలాండ్ 173/1 స్కోర్‌తో అధిగమించి 9 వికెట్ల తేడాతో ఘన విజయం సాధించింది. ఫిన్ అలెన్ అద్భుత సెంచరీకి ప్లేయర్ ఆఫ్ ది మ్యాచ్ అవార్డు లభించింది.

ఇక ఐసీసీ నాకౌట్ మ్యాచ్‌లలో సౌతాఫ్రికాకు మరో నిరాశ ఎదురైంది. 2011 వరల్డ్ కప్ క్వార్టర్ ఫైనల్ నుంచి 2026 T20 వరల్డ్ కప్ సెమీఫైనల్ వరకు వరుసగా కీలక మ్యాచ్‌లలో పరాజయాలు చవిచూసింది. దీంతో మరోసారి సౌతాఫ్రికా అభిమానులకు హార్ట్‌బ్రేక్ ఎదురైంది.