హార్దిక్ పాండ్యకు ప్రత్యామ్నాయం కోసం అతిగా ఆలోచించొద్దు: గావస్కర్

టీమిండియాలో హార్దిక్ పాండ్యకు సరైన ప్రత్యామ్నాయాన్ని గుర్తించడంపై భారత మాజీ క్రికెటర్ సునీల్ గావస్కర్ కీలక వ్యాఖ్యలు చేశారు. హార్దిక్ స్థాయి ఆల్‌రౌండర్‌ను వెతకడంపై జట్టు మేనేజ్‌మెంట్ అతిగా దృష్టి పెట్టాల్సిన అవసరం లేదని అభిప్రాయపడ్డారు. అతడికి సరిసమానమైన ఆటగాడు దొరకనప్పుడు, భిన్నమైన నైపుణ్యాలు కలిగిన ఆటగాళ్లకు అవకాశాలు ఇవ్వాలని సూచించారు. ఈ క్రమంలో నమన్ ధిర్ పేరును ప్రస్తావిస్తూ, వెస్టిండీస్‌తో జరిగిన ఐదో టీ20లో అతడి బ్యాటింగ్ ప్రదర్శనను గుర్తుచేశారు. తన బౌలింగ్ కోటాను కూడా సమర్థంగా పూర్తి చేయగల సామర్థ్యం నమన్ ధిర్‌కు ఉందని గావస్కర్ పేర్కొన్నారు.

వెస్టిండీస్‌తో జరిగిన సిరీస్‌ నుంచి భారత జట్టు పాఠాలు నేర్చుకోవాలని గావస్కర్ సూచించారు. జట్టులో కనీసం నలుగురు ప్రత్యేక బౌలర్లు ఉండాలని, మిగిలిన ఏడుగురిలో ఇద్దరు ఆల్‌రౌండర్లను ఎంపిక చేసుకోవచ్చని చెప్పారు. బ్యాటింగ్‌తో పాటు బౌలింగ్‌లోనూ రాణించగల ఆల్‌రౌండర్లు ఉంటే జట్టుకు ప్రయోజనం కలుగుతుందని వివరించారు. తొమ్మిదో స్థానం వరకు బ్యాటింగ్ చేయగల ఆటగాళ్లను ఎంచుకోవడంపైనే దృష్టి పెడితే బౌలింగ్ విభాగం బలహీనపడే ప్రమాదం ఉందని హెచ్చరించారు. అందువల్ల హార్దిక్‌కు ప్రత్యామ్నాయాన్ని వెతకడంతో పాటు, జట్టు బౌలింగ్ విభాగాన్ని బలోపేతం చేయడంపైనా మేనేజ్‌మెంట్ దృష్టి సారించాలని సూచించారు.