BBL: టీ20లో రికార్డుల వర్షం – 515 పరుగులు, 36 సిక్సులు!

బిగ్‌బాష్ లీగ్‌ (BBL) 15వ సీజన్‌లో జరిగిన 6వ మ్యాచ్‌ క్రికెట్ చరిత్రలో నిలిచిపోయేలా సాగింది. మొదట బ్యాటింగ్ చేసిన పెర్త్ స్కార్చర్స్ జట్టు 20 ఓవర్లలో భారీగా 257/6 పరుగులు చేసింది. ఫిన్ అలెన్ (79), కూపర్ కానోలీ (77) ధాటిగా ఆడుతూ వరుసగా సిక్సర్లు బాదేశారు. మొత్తం 18 సిక్సర్లు బాదిన పెర్త్ జట్టు, BBL చరిత్రలో మూడవ పెద్ద స్కోరు నమోదు చేసింది. ఇలాంటి భారీ స్కోరు చూసిన క్రికెట్ అభిమానులు మ్యాచ్‌ పెర్త్ ఖాయమని భావించారు.

అయితే, బ్రిస్బేన్ హీట్ బ్యాట్స్‌మెన్ అసాధ్యాన్ని సుసాధ్యం చేసి చూపించారు. లక్ష్య ఛేదనలో తొలి బంతికే కోలిన్ మన్రో ఔటైనా, జాక్ వైల్డర్‌ముత్ (110 నాటౌట్ – 54 బంతుల్లో), మాట్ రెన్‌షా (102 – 51 బంతుల్లో) అద్భుత ఇన్నింగ్స్‌లతో మ్యాచ్‌ను గెలుపుదారి పట్టించారు. ఈ ఇద్దరూ కలిసి రెండో వికెట్‌కు 213 పరుగుల భాగస్వామ్యం నమోదు చేయడంతో పాటు, చెరో 9 సిక్సర్లు బాదారు. టీ20 క్రికెట్‌లో ఛేజ్ చేస్తూ ఇద్దరు ఆటగాళ్లు సెంచరీలు చేయడం ఇదే మొదటిసారి.

ఈ దూకుడైన బ్యాటింగ్‌తో, బ్రిస్బేన్ హీట్ మరో బంతి మిగిలి ఉండగానే 258 పరుగులు చేసి 8 వికెట్ల తేడాతో అసాధారణ విజయం సాధించింది. దీంతో, బిగ్‌బాష్ చరిత్రలోనే అత్యధిక లక్ష్య ఛేజ్ రికార్డు సృష్టించబడింది. మ్యాచ్ మొత్తం 515 పరుగులు, 36 సిక్సులు నమోదు కావడంతో ఈ పోరు క్రికెట్ చరిత్రలో ప్రత్యేకంగా నిలిచిపోయింది.