భద్రతా ఆందోళనలతో భారత్‌ లో టీ20 ప్రపంచకప్‌ కు నో చెప్పిన బంగ్లాదేశ్‌

ఊహించినట్లే జరిగింది భద్రతా కారణాలను చూపుతూ వచ్చే నెలలో భారత్‌లో జరగనున్న టీ20 ప్రపంచకప్‌ మ్యాచ్‌లకు బంగ్లాదేశ్‌ జట్టు రాకూడదని నిర్ణయించింది. తమ మ్యాచ్‌లను మరో దేశంలో నిర్వహించాలని బంగ్లాదేశ్ క్రికెట్ బోర్డు (బీసీబీ) ఐసీసీ ని అధికారికంగా కోరింది.

భారత్‌–బంగ్లాదేశ్‌ల మధ్య ఇటీవల నెలకొన్న దౌత్యపరమైన ఉద్రిక్తతలే ఈ నిర్ణయానికి కారణమని తెలుస్తోంది. ఈ పరిణామాల మధ్యనే బీసీసీఐ ఆదేశాల మేరకు బంగ్లాదేశ్‌ ఫాస్ట్‌బౌలర్‌ ముస్తాఫిజుర్ రెహమాన్ ను కోల్‌కతా నైట్‌రైడర్స్ జట్టు విడుదల చేసింది. ఈ ఘటన తర్వాతి రోజే టీ20 ప్రపంచకప్‌ కోసం భారత్‌కు వెళ్లకూడదని బీసీబీ తుది నిర్ణయం తీసుకుంది.

‘గత 24 గంటల్లో చోటుచేసుకున్న పరిణామాలను సమీక్షించాం. బంగ్లాదేశ్‌ జట్టు భద్రత పై ఆందోళనలు పెరుగుతున్న నేపథ్యంలో, ప్రభుత్వ సూచనల మేరకు భారత్‌కు జట్టును పంపరాదని నిర్ణయించాం’ అని బీసీబీ ప్రకటనలో తెలిపింది. ప్రపంచకప్‌లో తమ మ్యాచ్‌లను శ్రీలంకకు తరలించాలని ఐసీసీని కోరినట్లు కూడా వెల్లడించింది.

ఒక్క ఆటగాడికే భద్రత కల్పించలేమని చెబుతున్నప్పుడు, మొత్తం జట్టుకు ఎలా భద్రత కల్పిస్తారు? అందుకే మేం భారత్‌లో ఆడలేం అని ఓ బీసీబీ అధికారి వ్యాఖ్యానించాడు. మరోవైపు, ఐపీఎల్‌ వేలానికి ముస్తాఫిజుర్‌ను అందుబాటులో ఉంచాలని కోరిన బీసీసీఐ, ఇప్పుడు అతడిని కేకేఆర్‌ నుంచి ఎందుకు విడుదల చేయించిందో వివరణ ఇవ్వాలంటూ బీసీబీ భారత బోర్డుకు లేఖ రాసింది.

గత ఏడాది బంగ్లాదేశ్‌ మాజీ ప్రధాని షేక్‌ హసీనా పదవి కోల్పోయిన తర్వాత ఇరు దేశాల మధ్య సంబంధాలు మరింత దిగజారాయి. ఆ తర్వాత బంగ్లాదేశ్‌లో హిందువుల పై దాడుల వార్తలు కూడా వచ్చాయి. ఈ పరిణామాలన్నీ తాజా నిర్ణయానికి నేపథ్యంగా మారాయి.

భారత్‌, శ్రీలంక సంయుక్తంగా ఆతిథ్యమిస్తున్న టీ20 ప్రపంచకప్‌ వచ్చే నెల 7 న ప్రారంభం కానుంది. షెడ్యూల్‌ ప్రకారం బంగ్లాదేశ్‌ నాలుగు లీగ్‌ మ్యాచ్‌లు భారత్‌లో ఆడాల్సి ఉంది. టోర్నీకి ఇంకా నెల రోజులే ఉండటంతో మ్యాచ్‌లను మరో దేశానికి మార్చడం చాలా కష్టమని బోర్డు వర్గాలు అంటున్నాయి. ఈ అంశం పై బీసీసీఐ ఇప్పటివరకు అధికారికంగా స్పందించలేదు.

ఇదిలా ఉండగా, తాజా పరిణామాల నేపథ్యంలో బంగ్లాదేశ్‌లో ఐపీఎల్‌ ప్రసారాలను నిలిపివేయాలంటూ సమాచార, ప్రసారాల మంత్రిత్వ శాఖకు విజ్ఞప్తి చేసినట్లు ప్రభుత్వ సలహాదారు అసిఫ్‌ నజ్రుల్‌ తెలిపారు. బంగ్లాదేశ్‌ క్రికెట్‌కు, ఆటగాళ్లకు అవమానాన్ని ఎట్టి పరిస్థితుల్లోనూ సహించం అని ఆయన వ్యాఖ్యానించారు.