బిగ్ బాస్ హోస్ట్‌లలో అత్యధిక రెమ్యునరేషన్ ఎవరిదంటే..

బిగ్ బాస్ భారతదేశంలో అత్యంత ప్రజాదరణ పొందిన రియాలిటీ షోలలో ఒకటిగా కొనసాగుతోంది. హిందీలో భారీ విజయాన్ని సాధించిన తర్వాత తెలుగు, తమిళం, మలయాళం, కన్నడ, బెంగాలీ తదితర భాషల్లోనూ ఈ షో విజయవంతమైంది. కంటెస్టెంట్ల ఆటతో పాటు వీకెండ్ ఎపిసోడ్లలో స్టార్ హోస్ట్‌ల సందడి కూడా షోకు ప్రత్యేక ఆకర్షణగా నిలుస్తోంది.

జాతీయ మీడియా కథనాల ప్రకారం బిగ్ బాస్ హోస్ట్‌లలో సల్మాన్ ఖాన్ అత్యధిక పారితోషికం అందుకునే వారిలో ముందున్నారు. హిందీ బిగ్ బాస్‌కు ఆయన ఒక్కో సీజన్‌కు సుమారు రూ.125 కోట్లు తీసుకుంటున్నట్లు సమాచారం. ఒక్కో వీకెండ్ ఎపిసోడ్‌కు రూ.15 కోట్లకు పైగా పారితోషికం అందుకుంటున్నట్లు కూడా కథనాలు పేర్కొంటున్నాయి.

తమిళ బిగ్ బాస్‌లో కమల్ హాసన్ ఏడు సీజన్ల పాటు హోస్ట్‌గా వ్యవహరించిన తర్వాత ఆయన స్థానంలో విజయ్ సేతుపతి బాధ్యతలు చేపట్టారు. ఈ షో కోసం ఆయన రూ.75 కోట్ల నుంచి రూ.80 కోట్ల వరకు అందుకుంటున్నట్లు టాక్. ఇక తెలుగు బిగ్ బాస్‌కు మూడో సీజన్ నుంచి హోస్ట్‌గా కొనసాగుతున్న నాగార్జున ఒక్కో సీజన్‌కు సుమారు రూ.35 కోట్ల నుంచి రూ.40 కోట్ల వరకు తీసుకుంటున్నట్లు నివేదికలు చెబుతున్నాయి.

మలయాళ బిగ్ బాస్ హోస్ట్ మోహన్‌లాల్‌కు సుమారు రూ.30 కోట్లు, కన్నడ బిగ్ బాస్ హోస్ట్ కిచ్చా సుదీప్‌కు దాదాపు రూ.20 కోట్లు అందుతున్నట్లు సమాచారం. బెంగాలీ బిగ్ బాస్‌కు మాజీ క్రికెటర్ సౌరవ్ గంగూలీ నాలుగేళ్ల ఒప్పందంలో భాగంగా సుమారు రూ.125 కోట్ల డీల్‌కు అంగీకరించినట్లు జాతీయ మీడియా కథనాలు పేర్కొంటున్నాయి. అయితే ఈ రెమ్యునరేషన్ వివరాలను సంబంధిత హోస్ట్‌లు లేదా ప్రసార సంస్థలు అధికారికంగా ధృవీకరించలేదు.