బిగ్‌బాస్ తెలుగు 10లో వైల్డ్‌ కార్డ్‌ ఎంట్రీలు.. ఈ ఐదుగురి పేర్లు వైరల్‌!

బిగ్‌బాస్ షోలో సాధారణంగా ఐదో వారం వచ్చేసరికి వైల్డ్‌ కార్డ్‌ ఎంట్రీలు ఆసక్తిని పెంచుతుంటాయి. ఇప్పుడు బిగ్‌బాస్ తెలుగు సీజన్‌ 10లోనూ ఇదే జరగబోతున్నట్లు వార్తలు వినిపిస్తున్నాయి. ప్రస్తుతం హౌస్‌లో 14 మంది కంటెస్టెంట్లు ఉండగా.. ఈ వారం అమన్, అపూర్వ, రోహిత్, ఝాన్సీ, చరణ్, షాలిని, నరేశ్, రాంప్రసాద్, త్రిగుణ్, ముకేష్‌ గౌడ నామినేషన్స్‌లో ఉన్నారు. ఈ వీకెండ్‌ డబుల్‌ ఎలిమినేషన్‌ ఉండే అవకాశం ఉందనే ప్రచారం కూడా జరుగుతోంది. అదే సమయంలో వైల్డ్‌ కార్డ్‌ ఎంట్రీలకు సంబంధించి పలువురి పేర్లు సోషల్‌ మీడియాలో చక్కర్లు కొడుతున్నాయి.

ఏడో సీజన్‌లో ఫినాలే వరకు వెళ్లిన సీరియల్‌ నటి ప్రియాంక ప్రియుడు శివకుమార్ వైల్డ్‌ కార్డ్‌గా ఎంట్రీ ఇవ్వనున్నట్లు ప్రచారం జరుగుతోంది. ప్రస్తుతం చేస్తున్న ‘నిన్ను కోరి’ సీరియల్‌ నుంచి తప్పుకోవడంతో ఈ వార్తలకు మరింత బలం చేకూరినట్లు తెలుస్తోంది. అలాగే గతంలో బిగ్‌బాస్‌ 5, ఓటీటీ సీజన్‌లో పాల్గొన్న కొరియోగ్రాఫర్‌ నటరాజ్‌ మాస్టర్‌ భార్య నీతు పేరు కూడా వినిపిస్తోంది. ‘అగ్నిపరీక్ష’లో పాల్గొన్న శ్రీకాకుళం యువకుడు నవరసాలు రామకృష్ణ పేరు కూడా జాబితాలో ఉందని టాక్‌. వీరితో పాటు నిఖిల్‌ మాజీ ప్రియురాలు కావ్యశ్రీ, జబర్దస్త్‌ ఫేమ్‌ నూకరాజు, రాకింగ్‌ రాకేశ్‌ పేర్లు కూడా వినిపిస్తున్నాయి. అయితే వీరిలో ఎవరు నిజంగా హౌస్‌లోకి అడుగుపెడతారనేది అధికారిక ప్రకటన తర్వాతే స్పష్టమవుతుంది.