బిగ్‌బాస్‌ 10లో కెప్టెన్సీ టాస్క్‌.. ఫుడ్‌ విషయంలో రోహిత్‌, అమన్‌ మధ్య గొడవ!

బిగ్‌బాస్‌ తెలుగు సీజన్‌ 10లో ఆరో వారం కెప్టెన్సీ టాస్క్‌ ఆసక్తికరంగా ప్రారంభమైంది. ‘రోడ్‌ బ్లాక్‌’ పేరుతో కొత్త టాస్క్‌ను ప్రకటించిన బిగ్‌బాస్‌.. వైల్డ్‌ కార్డ్‌ కంటెస్టెంట్లకు ముందుగానే కెప్టెన్సీ కంటెండర్లుగా అవకాశం కల్పించాడు. ఇంటి సభ్యులంతా మూడు టీమ్‌లుగా విడిపోయి బెడ్రూం, బాత్రూం, కిచెన్‌, బ్యాక్‌యార్డ్‌, లాంజ్‌ వంటి కీలక ప్రాంతాలను స్వాధీనం చేసుకోవాల్సి ఉంటుంది. తమ అవసరాలకు అనుగుణంగా ఇతర టీమ్‌లతో చర్చలు జరిపి డీల్స్‌ కుదుర్చుకోవాలని బిగ్‌బాస్‌ సూచించాడు. వైల్డ్‌ కార్డుల టీమ్‌ తమకు కేటాయించిన కుర్చీల్లో కనీసం ఒక్కటైనా కాపాడుకోవాలని, అప్పుడే ఆ టీమ్‌ సభ్యులు కెప్టెన్సీ పోటీలో కొనసాగుతారని స్పష్టం చేశాడు. టాస్క్‌ మొదలైన వెంటనే కిచెన్‌, ఆహార పదార్థాల విషయంలో సభ్యుల మధ్య పోటీ మొదలై వివాదానికి దారితీసింది.

ఆహారం విషయంలో రోహిత్‌, అమన్‌ మధ్య వాగ్వాదం చోటుచేసుకోవడంతో ఇంట్లో వాతావరణం వేడెక్కింది. ఆహారం అందరిదని, ఇతర సభ్యుల గురించి ఆలోచించకుండా కొందరు దాన్ని తీసుకోవడం సరికాదని రోహిత్‌ ప్రశ్నించాడు. దీనికి అమన్‌ స్పందిస్తూ రోహిత్‌ కోసమే ఆహారం తీసుకొచ్చానని చెప్పగా, తనకు చెప్పకుండా తానే తిన్నాడని రోహిత్‌ ఎదురుప్రశ్నించాడు. ఈ చర్చలో త్రిగుణ్‌ కూడా పాల్గొనడంతో వాదన మరింత పెరిగింది. మరోవైపు, శివ్‌ ఇతర టీమ్‌లతో కుర్చీలు, సభ్యుల విషయంలో డీల్స్‌ కుదుర్చుకునేందుకు ప్రయత్నించాడు. అయితే, అతడు చేసిన ఒక ప్రతిపాదనను ముకేశ్‌ తిరస్కరించాడు. కుర్చీలను ఎవరికీ ఇవ్వొద్దని శ్వేత తన టీమ్‌కు సూచించింది. ఆహారం, టీమ్‌ల మధ్య ఒప్పందాలు, కెప్టెన్సీ పోటీ నేపథ్యంలో ఈ టాస్క్‌ తదుపరి ఎపిసోడ్‌లో ఎలాంటి మలుపులు తిరుగుతుందో ఆసక్తికరంగా మారింది.