రైతు బీమా ఎక్కడికి పోయింది?.. కాంగ్రెస్‌ ప్రభుత్వంపై హరీశ్‌రావు ఫైర్‌

రాష్ట్రంలో రైతు బీమా పథకం అమలు నిలిచిపోవడం, విద్యుత్తు సరఫరా సమస్యలపై మాజీ మంత్రి, బీఆర్‌ఎస్‌ ఎమ్మెల్యే హరీశ్‌రావు కాంగ్రెస్‌ ప్రభుత్వంపై తీవ్ర విమర్శలు చేశారు. గత మూడు నెలలుగా రైతు బీమా సొమ్ము అందక వేలాది రైతు కుటుంబాలు ఇబ్బందులు పడుతున్నాయని ఆరోపించారు. సిద్దిపేట నియోజకవర్గంలో రైతు బీమా పరిహారం అందని కుటుంబాలతో ఎమ్మెల్యే క్యాంపు కార్యాలయంలో సమావేశమైన ఆయన.. బొగ్గు ఉత్పత్తి లేక విద్యుత్తు సరఫరా నిలిచిపోతోందని, ప్రాజెక్టుల్లో నీటి లభ్యత ఉన్నప్పటికీ మోటార్లు నడపకపోవడంతో రైతులకు నీరు అందడం లేదని పేర్కొన్నారు. ఈ పరిస్థితులకు రాష్ట్ర ప్రభుత్వమే బాధ్యత వహించాలని ప్రశ్నించారు.

ముఖ్యమంత్రి రేవంత్‌రెడ్డి, ఉప ముఖ్యమంత్రి భట్టి విక్రమార్క పాలనలో విఫలమయ్యారని హరీశ్‌రావు విమర్శించారు. తప్పులు ప్రభుత్వమే చేస్తూ విద్యుత్తు అధికారులను సస్పెండ్‌ చేస్తామని ప్రకటించడం సరికాదని, ముందుగా ప్రభుత్వ పెద్దలే బాధ్యత వహించాలని వ్యాఖ్యానించారు. రైతు బీమా పరిహారం అందక ఇబ్బందులు పడుతున్న కుటుంబాల సమస్యలను ప్రభుత్వం వెంటనే పరిష్కరించాలని డిమాండ్‌ చేశారు. ప్రభుత్వం స్పందించకపోతే బాధిత రైతు కుటుంబాలతో కలిసి ముఖ్యమంత్రి నివాసం ఎదుట ధర్నా నిర్వహించడంతో పాటు సచివాలయాన్ని ముట్టడిస్తామని హెచ్చరించారు.