ప్రజల నమ్మకాన్ని వమ్ము చేయలేదు.. హామీలను నెరవేరుస్తున్నాం - చంద్రబాబు

ఆంధ్రప్రదేశ్‌ ప్రజల నమ్మకాన్ని తమ ప్రభుత్వం వమ్ము చేయలేదని ముఖ్యమంత్రి చంద్రబాబు నాయుడు అన్నారు. ఎన్ని సవాళ్లు ఎదురైనా ఇచ్చిన హామీలను నిలబెట్టుకుంటూ, ప్రజల జీవన ప్రమాణాలను పెంచడమే లక్ష్యంగా పనిచేస్తున్నామని తెలిపారు. ఉండవల్లిలో నిర్వహించిన మీడియా సమావేశంలో ఆయన రాష్ట్ర అభివృద్ధి, సంక్షేమ పథకాలు, స్థానిక సంస్థల ఎన్నికలపై మాట్లాడారు. వైకాపా నేతల తీరుపై విమర్శలు గుప్పించిన చంద్రబాబు.. రాష్ట్రాభివృద్ధిని అడ్డుకునేలా వ్యవహరిస్తున్నారని ఆరోపించారు. గత ప్రభుత్వ హయాంలో రాష్ట్ర ప్రతిష్ఠ దెబ్బతిందని, ప్రస్తుతం ఆ పరిస్థితి నుంచి కోలుకుంటున్నామని పేర్కొన్నారు. స్థానిక సంస్థలు బలోపేతమైతేనే నిజమైన అధికార వికేంద్రీకరణ సాధ్యమవుతుందని, కేంద్రం, రాష్ట్రం, స్థానిక సంస్థలు సమన్వయంతో పనిచేయడం ముఖ్యమని అన్నారు.

తమ ప్రభుత్వం రూ.1.5 లక్షల కోట్లతో సంక్షేమ పథకాలు అమలు చేస్తోందని, సంక్షేమ క్యాలెండర్‌ ప్రకారం లబ్ధిదారులకు నిర్ణీత సమయంలో ప్రయోజనాలు అందిస్తున్నామని చంద్రబాబు తెలిపారు. దశాబ్దాలుగా పెండింగ్‌లో ఉన్న ప్రాజెక్టులను పూర్తి చేసేందుకు చర్యలు తీసుకుంటున్నామని చెప్పారు. ప్రభుత్వ సేవలపై ప్రజాభిప్రాయాన్ని నిరంతరం సేకరిస్తూ, లోపాలను సరిదిద్దుకుంటున్నామని వివరించారు. రాయలసీమను అభివృద్ధికి నమూనాగా తీర్చిదిద్దుతామని, మార్కాపురం ప్రాంతంలో వ్యవసాయాన్ని విస్తరించేందుకు కృషి చేస్తామని తెలిపారు. గత ప్రభుత్వ హయాంలో స్థానిక సంస్థల నిధులు మళ్లించారని, కేంద్ర పథకాలు నిలిచిపోయాయని ఆరోపించిన ఆయన.. కేంద్రంతో చర్చించి జల్‌ జీవన్‌ మిషన్‌ను పునరుద్ధరించామని వెల్లడించారు.