ఓటు బచావో – దేశ్ బచావో.. ప్రజాస్వామ్యాన్ని, రాజ్యాంగాన్ని కాపాడుకుందాం: మంత్రి పొన్నం ప్రభాకర్

తెలంగాణ బీజేపీ అధ్యక్షుడు ఎన్. రామచంద్రరావుకు మంత్రి పొన్నం ప్రభాకర్ సవాల్ విసిరారు. ఓటు హక్కు కోల్పోయిన బాధితులను ఆధారాలతో సహా తన ముందుకు తీసుకొస్తానని, ఇందుకోసం తేదీ, సమయం ప్రకటించాలని డిమాండ్ చేశారు. ఓటర్ల జాబితా సవరణలో తప్పులు జరిగితే వాటిని సరిదిద్ది, అర్హులైన ప్రతి ఒక్కరి ఓటు హక్కును కాపాడాలని సూచించారు. ఓటర్ల జాబితాపై జరుగుతున్న ఆందోళనలను తప్పుబట్టడం సరికాదని వ్యాఖ్యానించారు.

దేశవ్యాప్తంగా, తెలంగాణలో పెద్ద సంఖ్యలో ఓట్లు తొలగించబడ్డాయంటూ పొన్నం ప్రభాకర్ ఆరోపించారు. ముఖ్యంగా ఎస్సీ, ఎస్టీ, బీసీ, మైనార్టీ వర్గాల ఓట్ల తొలగింపుపై స్పష్టత ఇవ్వాలని డిమాండ్ చేశారు. ఓటర్ల జాబితాలో జరిగిన మార్పులపై ఎన్నికల సంఘం రికార్డులను పరిశీలించి, తొలగించిన ఓట్లలో అనర్హులవి ఎన్ని, అర్హులవి పొరపాటున తొలగించబడినవి ఎన్ని అనే వివరాలను వెల్లడించాలని కోరారు. “ఓటు బచావో–దేశ్ బచావో” నినాదంతో ప్రజాస్వామ్యాన్ని, రాజ్యాంగాన్ని కాపాడేందుకు పోరాడాలని పిలుపునిచ్చారు.