అమెరికా భారీ రక్షణ బిల్లు ఆమోదం – ఉక్రెయిన్‌కి సహాయం, సైనికులకు వేతన పెంపు!

వాషింగ్టన్‌: అమెరికా కాంగ్రెస్‌ దిగువ సభ ఈ ఆర్థిక సంవత్సరానికి సంబంధించిన రక్షణ కార్యక్రమాల కోసం 90,100 కోట్ల డాలర్లను వెచ్చించడానికి ఉద్దేశించిన బిల్లుకు బుధవారం ఆమోద ముద్ర వేసింది. ఈ బిల్లు ఇప్పుడు ఎగువ సభ అయిన సెనెట్‌ ఆమోదం కోసం వెళ్తుంది. వచ్చే వారం రోజుల్లో అది ఆమోదం పొందే అవకాశం ఉంది. ఈ బిల్లును “జాతీయ రక్షణ అధీకృత చట్టం”గా పిలుస్తారు.

ఈ బిల్లులో సైనిక దళాలకు వేతన పెంపు, కొత్త ఆయుధాల కొనుగోలు వేగవంతం చేయడం, మరియు రక్షణ వ్యవస్థలను బలపరచడం వంటి అంశాలు ఉన్నాయి. ఇటీవల కరీబియన్ సముద్రంలో డ్రగ్ స్మగ్లింగ్ చేస్తున్న బోట్లపై అమెరికా దళాలు 20 సార్లకు పైగా దాడులు చేశాయి. ఆ దాడుల వీడియోలను కాంగ్రెస్‌కు చూపించేవరకు రక్షణ మంత్రి పీటర్ హెగ్సెత్‌ ప్రయాణ బడ్జెట్‌లో 25% కోత పెట్టాలని బిల్లులో పేర్కొన్నారు.

అదే విధంగా, ఉక్రెయిన్‌కు వచ్చే రెండు సంవత్సరాలపాటు ప్రతి ఏడాది 40 కోట్ల డాలర్ల సాయాన్ని అందించనున్నారు. ఐరోపాలో కనీసం 76,000 మంది అమెరికన్ సైనికులను, దక్షిణ కొరియాలో 28,500 మందిని కొనసాగించాలని కూడా ఈ బిల్లు నిర్ణయించింది. అయితే, వాతావరణ మార్పుల నిరోధానికి కేటాయించిన నిధులపై 160 కోట్ల డాలర్ల కోత విధించారు.