యుద్ధం ఆగకపోతే ఉక్రెయిన్‌కి “టొమాహాక్” క్షిపణులు పంపిస్తాం – రష్యాకు ట్రంప్ హెచ్చరిక!

రష్యాపై అమెరికా అధ్యక్షుడు డొనాల్డ్ ట్రంప్ ఘాటైన హెచ్చరిక జారీ చేశారు. “యుద్ధం కొనసాగితే ఉక్రెయిన్‌కి దూరప్రాంత దాడుల కోసం ఉపయోగించే టొమాహాక్ క్షిపణులు పంపించవచ్చు” అని ఆయన అన్నారు.ఎయిర్ ఫోర్స్ వన్ విమానంలో జర్నలిస్టులతో మాట్లాడిన ట్రంప్, ఉక్రెయిన్ అధ్యక్షుడు జెలెన్స్కీతో ఫోన్‌లో మాట్లాడినట్టు చెప్పారు. “అది చాలా ఫలప్రదమైన చర్చ” అని పేర్కొన్నారు.“టొమాహాక్ చాలా శక్తివంతమైన దాడి ఆయుధం — రష్యాకు అలాంటిది అవసరం లేదు,” అని ట్రంప్ అన్నారు. ఇది రష్యాపై ఆయన మరింత కఠిన వైఖరిని సూచిస్తోంది.

ఇక రష్యా మాత్రం దీనిపై తీవ్ర ఆందోళన వ్యక్తం చేస్తూ, “అమెరికా ఇలాంటి క్షిపణులు ఉక్రెయిన్‌కి ఇస్తే, రెండు దేశాల సంబంధాలు దెబ్బతింటాయి” అని తెలిపింది.ఉక్రెయిన్ విద్యుత్ వ్యవస్థపై రష్యా దాడులు కొనసాగుతున్న వేళ, ట్రంప్ “ఉక్రెయిన్ తన కోల్పోయిన భూభాగాన్ని తిరిగి సాధించగలదు” అని నమ్మకం వ్యక్తం చేశారు.