టిమ్ కుక్‌ పై ట్రంప్ ప్రశంసలు

టెక్ రంగంలో ప్రముఖ నాయకుడిగా నిలిచిన టిమ్ కుక్ పనితీరును అమెరికా అధ్యక్షుడు డోనాల్డ్ ట్రంప్ ప్రశంసించారు. ఆపిల్ సంస్థను ప్రస్తుత స్థాయికి తీసుకువచ్చే విషయంలో కుక్ పాత్ర ఎంతో కీలకమని పేర్కొన్నారు. తన సోషల్ మీడియా వేదిక ట్రూత్ సోషల్ ట్రంప్ ఈ వ్యాఖ్యలు చేశారు. సాధారణంగా యాపిల్ అంటే స్టీవ్ జాబ్స్ పేరు గుర్తొస్తుందని, కానీ తన దృష్టిలో కుక్ నాయకత్వం సంస్థను మరింత ఉన్నత స్థాయికి చేర్చిందని తెలిపారు.

టిమ్ కుక్, స్టీవ్ జాబ్స్ ఇద్దరికీ నేను అభిమానిని. అయితే జాబ్స్ కొనసాగినా యాపిల్ బాగా పనిచేసేదే కానీ, కుక్ హయాంలో ఉన్నంత ఎదుగుదల సాధ్యమయ్యేదో లేదో అనుమానం అని ట్రంప్ వ్యాఖ్యానించారు.

తమ మధ్య ఉన్న సంబంధాన్ని గుర్తుచేసుకుంటూ, కుక్ పని తీరు ప్రత్యేకమని అన్నారు. సమస్యలు వచ్చినప్పుడు మధ్యవర్తులపై ఆధారపడకుండా నేరుగా సంప్రదించి పరిష్కారం కోరడం ఆయన ప్రత్యేకతగా ట్రంప్ పేర్కొన్నారు. కంపెనీ ప్రయోజనాల కోసం కుక్ చూపించే నిబద్ధతను కూడా ఆయన కొనియాడారు. దాదాపు ఒకటిన్నర దశాబ్దాల పాటు యాపిల్‌కు నాయకత్వం వహించిన టిమ్ కుక్ ఈ ఏడాది సెప్టెంబర్ 1న సీఈఓ పదవి నుంచి తప్పుకోనున్నారు. ఆయన స్థానంలో జాన్ టెర్నస్ బాధ్యతలు స్వీకరించనున్నారు.

ఆబర్న్ విశ్వవిద్యాలయంలో ఇంజినీరింగ్ చదివిన కుక్, IBM మరియు Compaq వంటి సంస్థల్లో పనిచేసి అనుభవం సంపాదించారు. యాపిల్‌లో చేరిన తర్వాత సరఫరా వ్యవస్థను మెరుగుపరచి కంపెనీ లాభాలను పెంచడంలో కీలక పాత్ర పోషించారు. స్టీవ్ జాబ్స్ మరణం తర్వాత సీఈఓగా బాధ్యతలు చేపట్టి సంస్థను గ్లోబల్ స్థాయిలో మరింత బలపరిచారు. ఇప్పుడు కుక్ ఎగ్జిక్యూటివ్ ఛైర్మన్‌గా కొత్త బాధ్యతలు స్వీకరించేందుకు సిద్ధమవుతున్నారు.