సొంతూరిలో సీఎం రేవంత్ రెడ్డి దసరా వేడుకలు..

తెలంగాణ ముఖ్యమంత్రి ఎ. రేవంత్ రెడ్డి తన స్వగ్రామమైన నాగర్‌కర్నూల్ జిల్లా వంగూరు మండలంలోని కొండారెడ్డిపల్లిలో కుటుంబ సభ్యులతో కలిసి విజయదశమి వేడుకలు జరుపుకున్నారు. గ్రామానికి చేరుకున్న ఆయనకు ప్రజాప్రతినిధులు, ఉన్నతాధికారులు, గ్రామస్థులు ఘన స్వాగతం పలికారు. అనంతరం శ్రీ ఆంజనేయ స్వామి ఆలయాన్ని దర్శించుకుని ప్రత్యేక పూజలు నిర్వహించారు. అర్చకుల ఆశీర్వచనం స్వీకరించిన ముఖ్యమంత్రి గ్రామస్థులను ఆప్యాయంగా పలకరిస్తూ పండుగ ఆనందాన్ని వారితో పంచుకున్నారు. సాయంత్రం కుటుంబ సభ్యులతో కలిసి కోట మైసమ్మ ఆలయాన్ని సందర్శించి అమ్మవారికి ప్రత్యేక పూజలు చేశారు.

అనంతరం ప్రజాప్రతినిధులు, గ్రామస్థులతో కలిసి కాలినడకన జమ్మి చెట్టు వద్దకు చేరుకుని సంప్రదాయబద్ధంగా పూజలు నిర్వహించారు. బతుకమ్మ ఆటపాటలు, సంప్రదాయ ఆచారాలు, గ్రామస్థుల ఆత్మీయ పలకరింపులతో కొండారెడ్డిపల్లిలో పండుగ వాతావరణం నెలకొంది. హైదరాబాద్‌కు తిరిగి వెళ్తున్న సమయంలో ముఖ్యమంత్రి కల్వకుర్తి ప్రభుత్వ ఉన్నత పాఠశాల మైదానంలో నిర్వహించిన రావణ దహన కార్యక్రమానికి హాజరయ్యారు. అక్కడికి వచ్చిన ప్రజలకు విజయదశమి శుభాకాంక్షలు తెలిపారు. ఈ కార్యక్రమంలో ఎంపీ మల్లు రవి, ఎమ్మెల్యే కసిరెడ్డి నారాయణరెడ్డి, ఇతర స్థానిక ప్రజాప్రతినిధులు పాల్గొన్నారు.