డోనాల్డ్ ట్రంప్ రెండో పాలనలో సంచలన నిర్ణయాలు... 20 విజయాలను విశ్లేషించిన వాషింగ్టన్ పోస్ట్

అమెరికా అధ్యక్షుడిగా డోనాల్డ్ ట్రంప్ తన రెండో పాలనలో తీసుకున్న కీలక నిర్ణయాలు దేశీయంగా మాత్రమే కాకుండా అంతర్జాతీయ స్థాయిలోనూ విస్తృత ప్రభావం చూపాయని ప్రముఖ పత్రిక వాషింగ్టన్ పోస్ట్ ప్రత్యేక కథనంలో పేర్కొంది. ఈ కథనాన్ని మార్క్ ఎ. థిస్సెన్ రచించగా, గత ఏడాదిలో ట్రంప్ అమలు చేసిన 20 ప్రధాన నిర్ణయాలను విశ్లేషించారు. సాధారణంగా ఇలాంటి విశ్లేషణలకు ఉపయోగించే 10 పాయింట్ల జాబితా ఈసారి సరిపోలేదని ఆయన అభిప్రాయపడ్డారు.

ఈ నిర్ణయాల్లో అత్యంత ప్రాధాన్యత కలిగినదిగా ఇరాన్ అణు కార్యక్రమాన్ని అడ్డుకోవడాన్ని పేర్కొన్నారు. ‘ఆపరేషన్ మిడ్‌నైట్ హ్యామర్’ పేరుతో చేపట్టిన చర్య ట్రంప్ విదేశాంగ విధానంలో అత్యంత సాహసోపేతమైన నిర్ణయంగా పత్రిక అభివర్ణించింది. ఈ చర్య ద్వారా అమెరికా తన భద్రతా ప్రయోజనాల విషయంలో రాజీపడదని స్పష్టమైన సంకేతం ఇచ్చిందని విశ్లేషించింది.

అంతర్జాతీయ శాంతి స్థాపనలో కూడా ట్రంప్ కీలక పాత్ర పోషించారని కథనం వెల్లడించింది. భారత్–పాకిస్థాన్ మధ్య ఉద్రిక్తతలు, ఇజ్రాయెల్–ఇరాన్, ఇజ్రాయెల్–హమాస్ మధ్య తలెత్తిన సంఘర్షణలను తగ్గించే ప్రయత్నాల్లో ఆయన జోక్యం ఫలితాలు ఇచ్చిందని పేర్కొంది. అలాగే పలు దేశాల మధ్య కొనసాగుతున్న సరిహద్దు వివాదాల పరిష్కారంలో అమెరికా ప్రభావం మరింత బలపడిందని వివరించింది.

దేశంలో అంతర్గత భద్రత, ఆర్థిక అంశాల్లోనూ ట్రంప్ నిర్ణయాలు స్పష్టమైన ముద్ర వేశాయని పేర్కొన్నారు. అక్రమ వలసలను దాదాపు పూర్తిస్థాయిలో నియంత్రించడంతో పాటు, అమెరికా పిల్లల భవిష్యత్తును దృష్టిలో పెట్టుకుని ‘ట్రంప్ అకౌంట్స్’ పేరుతో ప్రతి చిన్నారికి 1,000 డాలర్ల ట్రస్ట్ ఫండ్‌ను ప్రారంభించారు. ఈ పథకం భవిష్యత్ తరాలకు ఆర్థిక భద్రత కల్పించే లక్ష్యంతో రూపొందించబడినదిగా విశ్లేషించారు.

రక్షణ రంగంలోనూ ట్రంప్ దూకుడైన నిర్ణయాలు తీసుకున్నారని కథనం పేర్కొంది. నాటో కూటమిలోని సభ్య దేశాలు తమ రక్షణ వ్యయాన్ని జీడీపీలో 5 శాతానికి పెంచేలా ఒప్పించడంలో ఆయన విజయం సాధించారు. అలాగే యూఎస్ ఎయిడ్ ను మూసివేయడం, రక్షణ బడ్జెట్‌ను భారీగా పెంచడం వంటి నిర్ణయాలు అమెరికా జాతీయ భద్రతకు ప్రాధాన్యం ఇచ్చే విధంగా ఉన్నాయని పత్రిక అభిప్రాయపడింది.

వాణిజ్య రంగంలో టారిఫ్ హెచ్చరికల ద్వారా యూరప్, ఆసియా దేశాలతో కొత్త ఒప్పందాలు కుదుర్చుకోవడం కూడా ట్రంప్ వ్యూహాత్మక నిర్ణయాల్లో ఒకటిగా పేర్కొన్నారు. మొత్తం మీద, రెండో విడత పాలనలో ట్రంప్ తీసుకున్న నిర్ణయాలు అమెరికా ప్రపంచ రాజకీయాల్లో తన స్థానాన్ని మరింత బలపరిచాయని ఈ విశ్లేషణ స్పష్టం చేస్తోంది.