కాంగ్రెస్‌కు గుడ్‌బై చెప్పనున్న సీనియర్ నాయకుడు..

కాంగ్రెస్ పార్టీకి చెందిన సీనియర్ నాయకుడు, మాజీ మంత్రి జీవన్‌ రెడ్డి త్వరలో పార్టీకి రాజీనామా చేయనున్నట్లు ప్రకటించారు. జగిత్యాల జిల్లా రాయికల్ పట్టణంలో నిన్న పర్యటించిన ఆయన ఈ విషయాన్ని వెల్లడించారు. విలేకరులతో మాట్లాడుతూ, తాను దశాబ్దాలుగా కాంగ్రెస్ పార్టీకే సేవలు అందించానని చెప్పారు. అయితే ప్రస్తుతం రాష్ట్ర ప్రభుత్వంలో జరుగుతున్న పరిణామాల నేపథ్యంలో తాను ఆ పార్టీలో కొనసాగడం కష్టంగా మారిందని తెలిపారు. అందుకే ముందుగా కాంగ్రెస్ పార్టీకి రాజీనామా చేయాలని నిర్ణయించుకున్నట్లు వెల్లడించారు.

రాజీనామా లేఖను ఢిల్లీకి వెళ్లి పార్టీ అధిష్టానానికి ఇస్తారా అని ప్రశ్నించగా, ఇక్కడ నుంచే రాజీనామా చేస్తానని చెప్పారు. అలాగే రంజాన్ మరియు ఉగాది పండుగల తరువాత తన అభిమానులతో మరోసారి సమావేశమై భవిష్యత్ రాజకీయ నిర్ణయం తీసుకుంటానని తెలిపారు. ఏ పార్టీలో చేరాలనే విషయంపై అప్పుడే స్పష్టత ఇస్తానని ఆయన పేర్కొన్నారు.