జననాయగన్ లీక్‌తో బీజేపీకి సంబంధం లేదు - అన్నామలై

విజయ్ నటించిన ‘జననాయగన్’ సినిమా విడుదలకు ముందే ఇంటర్నెట్‌లో లీక్ కావడం ప్రస్తుతం పెద్ద చర్చనీయాంశంగా మారింది. సెన్సార్ బోర్డు సమస్యల కారణంగా ఆలస్యమైన ఈ చిత్రం థియేటర్లకు రాకముందే పైరసీకి గురికావడం పట్ల సినీ పరిశ్రమలోని పలువురు ప్రముఖులు ఆగ్రహం వ్యక్తం చేశారు. ఇదే సమయంలో, ఈ లీక్ వెనుక కేంద్ర మంత్రి ఎల్. మురుగన్ పాత్ర ఉందని టీవీకే ఆరోపణలు చేయడంతో ఈ అంశం రాజకీయ రంగు దాల్చింది. అయితే ఈ ఆరోపణలను తమిళనాడు బీజేపీ మాజీ అధ్యక్షుడు కె. అన్నామలై తీవ్రంగా ఖండించారు. సినిమా లీక్ అవడం చట్టవిరుద్ధమని పేర్కొంటూ, పైరేటెడ్ కంటెంట్‌కు దూరంగా ఉండాలని ప్రజలకు సూచించారు.

కోయంబత్తూరులో పార్టీ అభ్యర్థి తరఫున ప్రచారం నిర్వహిస్తున్న అన్నామలై, మీడియాతో మాట్లాడుతూ ఈ వివాదంలో బీజేపీని అనవసరంగా లాగుతున్నారని విమర్శించారు. సినిమాల విడుదల లేదా లీక్ వంటి విషయాల్లో పార్టీకి ఎలాంటి సంబంధం లేదని స్పష్టం చేశారు. వదంతులు వ్యాప్తి చేస్తున్న వారిపై పోలీసులు కఠిన చర్యలు తీసుకోవాలని కోరుతూ, రాజకీయ ప్రయోజనాల కోసం తప్పుడు ఆరోపణలు చేయడం సరికాదని తెలిపారు.