నన్ను చాలా మంది టార్గెట్ చేశారు, ఎంత కాలం ఉంటానో తెలియదు - ట్రంప్ సంచలన వ్యాఖ్యలు

అమెరికా అధ్యక్షుడు డొనాల్డ్ ట్రంప్ నివాసమైన మార్ ఎ లాగో పరిసరాల్లోకి ఇటీవల తుపాకీతో చొరబడిన ఓ యువకుడిని భద్రతా సిబ్బంది కాల్చిచంపారు. ఈ ఘటనపై ట్రంప్ తొలిసారిగా స్పందిస్తూ, తనను చాలామంది టార్గెట్ చేసుకున్నారని వ్యాఖ్యానించారు. ఇంకా తాను ఎంతకాలం ఉంటానో తెలియదని చెప్పడం రాజకీయ వర్గాల్లో చర్చనీయాంశమైంది. అయితే, ఆ యువకుడు ఎస్టేట్‌లోకి ప్రవేశించిన సమయంలో ట్రంప్ అక్కడ లేరని భద్రతా అధికారులు వెల్లడించారు. సాధారణంగా వారాంతాల్లో ట్రంప్ ఫ్లోరిడాలోని తన ఎస్టేట్‌లో గడుపుతుంటారు.

గతంలో కూడా ట్రంప్‌పై పలుమార్లు హత్యాయత్నాలు జరిగిన విషయం తెలిసిందే. 2024 ఎన్నికల ప్రచారం సమయంలో ఒక యువకుడు కాల్పులకు దిగగా, తూటా ట్రంప్ చెవిని తాకుతూ వెళ్లింది. ఆ ఘటనలో ఆయనకు స్వల్ప గాయమై ప్రాణాపాయం తప్పింది. అప్పుడే తనలాంటి నాయకులకు ఎప్పుడూ ముప్పు ఉంటుందని ట్రంప్ వ్యాఖ్యానించారు. ఇలాంటి ప్రమాదాలను ఎదుర్కొన్న పూర్వ అమెరికా అధ్యక్షుల గురించి కూడా ఆయన ప్రస్తావించారు.