సిరిసిల్ల లో క్రికెట్ బ్యాట్ పట్టిన కేటీఆర్‌

నూతన సంవత్సరాన్ని పురస్కరించుకుని బీఆర్ఎస్ వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్) తన సొంత నియోజకవర్గం సిరిసిల్లలో పర్యటించారు. ఈ సందర్భంగా పలు అభివృద్ధి కార్యక్రమాల్లో పాల్గొన్న ఆయన, ప్రజలతో నేరుగా మమేకమయ్యారు.

సిరిసిల్ల పట్టణంలో నిర్వహించిన కేటీఆర్ కప్ క్రికెట్ టోర్నమెంట్ ప్రత్యేక ఆకర్షణగా నిలిచింది. జూనియర్ కళాశాల మైదానంలో జరిగిన ఈ టోర్నమెంట్‌లో కేటీఆర్ స్వయంగా మైదానంలోకి దిగారు. యువ క్రీడాకారులతో కలిసి కాసేపు క్రికెట్ ఆడుతూ, భారీ షాట్లతో ప్రేక్షకులను ఉత్సాహపరిచారు.

బ్యాట్‌తో స్టైలిష్ షాట్లు కొడుతూ కనిపించిన కేటీఆర్‌కి, సినిమాటిక్ టచ్ కూడా జతకావడంతో అక్కడున్నవారు చప్పట్లతో హోరెత్తించారు. ముఖ్యంగా ఒక షాట్‌ అయితే తాజా సినిమాలో నటుడు రామ్ చరణ్ స్టైల్‌ను గుర్తు చేసేలా ఉందని అభిమానులు వ్యాఖ్యానించారు.

ఈ క్షణాలను కెమెరాల్లో బంధించిన ఫోటోలు, వీడియోలు సోషల్ మీడియాలో వైరల్‌గా మారాయి. అభిమానులు “రాజకీయాల్లోనే కాదు, స్టైల్‌లో కూడా కేటీఆర్ ప్రత్యేకం” అంటూ ప్రశంసలు కురిపిస్తున్నారు. కార్యక్రమం ముగింపులో టోర్నమెంట్ విజేతలకు కేటీఆర్ బహుమతులు అందజేసి క్రీడాకారులను అభినందించారు.