గ్రేటర్ ఎన్నికలే లక్ష్యంగా కవిత రణభేరి.. రేపు కీలక సమావేశం

తెలంగాణ రక్షణ సేన చీఫ్‌ కల్వకుంట్ల కవిత గ్రేటర్‌ హైదరాబాద్‌తో పాటు సైబరాబాద్‌, మల్కాజిగిరి కార్పొరేషన్ల ఎన్నికలే లక్ష్యంగా రాజకీయ కార్యాచరణకు సిద్ధమవుతున్నారు. ఇందులో భాగంగా శుక్రవారం మధ్యాహ్నం 3 గంటలకు మియాపూర్‌లోని నరేన్‌ గార్డెన్స్‌లో ‘రాజధాని రణభేరి’ పేరుతో కీలక సమావేశం నిర్వహించనున్నారు. మూడు కార్పొరేషన్ల పరిధి నుంచి పార్టీ ముఖ్య నాయకులు ఈ సమావేశానికి హాజరుకానున్నారు.

రాష్ట్ర రాజధానిలో పార్టీ బలాన్ని చాటడమే లక్ష్యంగా కవిత రాజకీయ వ్యూహాలను రూపొందిస్తున్నారు. ఇప్పటికే గ్రేటర్‌ పరిధిలోని అసెంబ్లీ నియోజకవర్గాల ఇన్‌ఛార్జీలు, ముఖ్య నాయకులతో ఆమె సమావేశం నిర్వహించారు. తాజాగా జరగనున్న సమావేశంలో బల్దియా ఎన్నికలపై నాయకులకు దిశానిర్దేశం చేయడంతో పాటు, మూడు కార్పొరేషన్ల పరిధిలోని 300 డివిజన్లలో అభ్యర్థులను బరిలోకి దింపడం, ఎన్నికల ఎజెండా వంటి అంశాలపై స్పష్టత ఇచ్చే అవకాశం ఉంది.