విజయ్‌కు కమల్ హాసన్ మద్దతు.. తమిళ రాజకీయాల్లో కొత్త చర్చ?

డీఎంకే మద్దతుతో ప్రస్తుతం రాజ్యసభ సభ్యుడిగా ఉన్న కమల్ హాసన్, ఇటీవల తన రాజకీయ వైఖరితో తమిళనాడు రాజకీయాల్లో కొత్త చర్చకు దారితీశారు. తాజాగా తమిళనాడు ముఖ్యమంత్రిగా బాధ్యతలు చేపట్టిన టీవీకే అధినేత సి. జోసెఫ్ విజయ్‌పై కమల్ హాసన్ వరుసగా ప్రశంసలు కురిపించడం రాజకీయ వర్గాల్లో ఆసక్తికరంగా మారింది. ఎన్నికల విజయం తర్వాత మాత్రమే కాకుండా, పలుమార్లు విజయ్‌ను బహిరంగంగా అభినందిస్తూ ఆయనను తరచూ కలుస్తుండటం ఇప్పుడు హాట్ టాపిక్‌గా మారింది.

టీవీకే పార్టీ డీఎంకేకు రాజకీయ ప్రత్యర్థిగా భావిస్తున్న సమయంలో కమల్ – విజయ్ సన్నిహిత్యం మరింత చర్చకు దారితీస్తోంది. భవిష్యత్తులో రాజకీయ అవకాశాలను దృష్టిలో పెట్టుకుని కమల్ హాసన్ టీవీకేకు మరింత దగ్గరవుతారనే ఊహాగానాలు రాజకీయ వర్గాల్లో వినిపిస్తున్నాయి. దీనిపై ఎలాంటి అధికారిక ప్రకటన లేకపోయినా, ఇద్దరి మధ్య పెరుగుతున్న సాన్నిహిత్యం ప్రస్తుతం తమిళ రాజకీయాల్లో ప్రధాన చర్చాంశంగా మారింది.