ట్రంప్‌కు ఇరాన్ ప్రత్యక్ష బెదిరింపులు.. అమెరికా సైనిక చర్యకు రంగం సిద్ధం

నిరసనకారులపై అణచివేతకు పాల్పడుతున్న ఇరాన్‌పై అమెరికా సైనిక చర్య తప్పదన్న సంకేతాలు కనిపిస్తున్నాయి. ఇరాన్ నిరసనకారులకు ముందునుంచే మద్దతు ఇస్తున్న డోనాల్డ్ ట్రంప్, టెహ్రాన్‌పై దాడులకు సిద్ధమవుతున్నట్లు సమాచారం. ఈ నేపథ్యంలో ట్రంప్‌పై ఇరాన్ ప్రత్యక్ష బెదిరింపులకు దిగింది. గతంలో ట్రంప్‌పై జరిగిన హత్యాయత్నానికి సంబంధించిన దృశ్యాలను ఇరాన్ ప్రభుత్వ టీవీ ప్రసారం చేస్తూ, “ఈసారి బుల్లెట్ గురి తప్పదు” అనే హెచ్చరికను టెలీకాస్ట్ చేసినట్లు అంతర్జాతీయ మీడియా వెల్లడించింది.

ఇరాన్‌పై అమెరికా ఎప్పుడైనా దాడి చేయవచ్చనే ఊహాగానాల మధ్య ఈ బెదిరింపులు తీవ్ర చర్చకు దారితీశాయి. 2024 జూలైలో పెన్సిల్వేనియాలో ట్రంప్ ఎన్నికల ప్రచారం సమయంలో జరిగిన కాల్పుల్లో ఆయన చెవికి గాయం కావడం తెలిసిందే. ఆ ఘటన వెనుక ఇరాన్ హస్తం ఉందని అప్పట్లో అమెరికా ఆరోపించింది. ఇదిలా ఉండగా, ఖతార్‌లోని అల్ ఉదెయిద్ వైమానిక స్థావరం సహా పశ్చిమాసియాలోని పలు సైనిక కేంద్రాల నుంచి అమెరికా సిబ్బందిని వెనక్కు తీసుకువస్తోంది. మరోవైపు, నిరసనలపై ఉక్కుపాదం మోపుతున్న ఇరాన్‌లో మరణాల సంఖ్య 3 వేలు దాటినట్లు అంచనాలు వెలువడుతున్నాయి.