హర్మూజ్ జలసంధి తెరవడంపై ఇరాన్-అమెరికా ఒప్పందం?

ఇరాన్ మరియు అమెరికా మధ్య ఉద్రిక్తతలను తగ్గించే దిశగా కీలక చర్చలు వేగవంతమయ్యాయి. ఇరుదేశాలు 60 రోజుల కాల్పుల విరమణ ఒప్పందంపై చర్చలు జరుపుతున్నట్లు ఇరాన్ అధికారిక మీడియా వెల్లడించింది. ప్రతిపాదిత ఒప్పందంలో భాగంగా హర్మూజ్ జలసంధిని 60 రోజులపాటు తెరవడం, ఇరాన్ అణు కార్యక్రమాలను తాత్కాలికంగా నిలిపివేయడం వంటి అంశాలు ఉన్నట్లు సమాచారం.

ఈ ఒప్పందం ప్రకారం హర్మూజ్ జలసంధిలో అమర్చిన మందుపాతరలను తొలగించేందుకు ఇరాన్ అంగీకరించినట్లు తెలుస్తోంది. మరోవైపు అమెరికా, ఇరాన్ ఓడరేవులపై ఉన్న ఆంక్షలను సడలించి చమురు ఎగుమతులకు అవకాశం కల్పించే అంశాన్ని పరిశీలిస్తున్నట్లు సమాచారం. ఖతార్ బ్యాంకుల్లో నిలిపివేసిన సుమారు 6 బిలియన్ డాలర్ల ఇరాన్ ఆస్తుల విడుదల, లెబనాన్‌లో కాల్పుల విరమణ వంటి అంశాలు కూడా చర్చల్లో ఉన్నట్లు ఇరాన్ మీడియా పేర్కొంది. అయితే దీనిపై ఇరుదేశాల నుంచి అధికారిక ప్రకటన రావాల్సి ఉంది.