తమిళనాడులో రాష్ట్రపతి పాలన వద్దనే ఆ నిర్ణయం

తమిళనాడులో టీవీకే ప్రభుత్వ ఏర్పాటుకు కాంగ్రెస్ సహా డీఎంకే కూటమి పక్షాలు మద్దతు ఇవ్వడంపై మాజీ ముఖ్యమంత్రి ఎం.కే స్టాలిన్ స్పందించారు. రాష్ట్రపతి పాలన విధించడాన్ని నివారించాలనే ఉద్దేశంతోనే తమ కూటమి భాగస్వామ్య పక్షాలు తీసుకున్న నిర్ణయానికి తాను అనుమతించానని ఆయన తెలిపారు. ప్రజాస్వామ్యంలో ఇది వారి హక్కు అని పేర్కొన్నారు.

చెన్నైలో జరిగిన ఓ కార్యక్రమంలో మాట్లాడిన స్టాలిన్, టీవీకేతో వెళ్లే విషయాన్ని కొన్ని పార్టీలు తన దృష్టికి తీసుకువచ్చాయని తెలిపారు. రాష్ట్రంలో బీజేపీ పాలనకు అవకాశం రాకుండా చూడటమే తమ లక్ష్యమని అన్నారు. అసెంబ్లీ ఎన్నికల ఫలితాలు తమను నిరుత్సాహపరచవని, ప్రతిపక్షంలో ఉంటూనే ప్రజలకు సేవ చేస్తామని స్పష్టం చేశారు.