గ్రీన్ అమ్మోనియా ప్రాజెక్టు తో కాలుష్య రహిత ఇంధన దిశగా ఏపీ – ఉప ముఖ్యమంత్రి పవన్ కళ్యాణ్

ప్రభుత్వాలు, పార్టీలు మారినా పరిపాలనా విధానాలు స్థిరంగా ఉండాలని రాష్ట్ర ఉప ముఖ్యమంత్రి పవన్ కళ్యాణ్ స్పష్టం చేశారు. గతంలో రాష్ట్రానికి వచ్చిన పెట్టుబడిదారులను వేధించి, కోర్టుల చుట్టూ తిప్పిన ఘటనలు జరిగాయని, అయితే కూటమి ప్రభుత్వం ప్రతి అడుగులో పెట్టుబడిదారుల్లో విశ్వాసం నింపుతూ వారికి అండగా నిలుస్తుందని ఆయన తెలిపారు.

గౌరవ ముఖ్యమంత్రి చంద్రబాబు నాయుడు నేతృత్వంలోని ప్రభుత్వంలో పెట్టుబడిదారులకు ఎలాంటి వేధింపులు ఉండవని పవన్ కళ్యాణ్ భరోసా ఇచ్చారు. రాష్ట్రంలో పెట్టుబడులకు అనుకూలమైన వాతావరణం కల్పిస్తూ, పర్యావరణ పరిరక్షణతో పాటు అభివృద్ధిని సమతుల్యం చేస్తూ ఆంధ్రప్రదేశ్‌ను అగ్రగామిగా నిలిపే దిశగా ప్రభుత్వం వేగంగా ముందుకెళ్తోందని పేర్కొన్నారు.

పునరుత్పాదక ఇంధన రంగంలో రాష్ట్రాన్ని దేశంలో మొదటి స్థానంలో నిలపడం కూటమి ప్రభుత్వ ప్రధాన లక్ష్యమని చెప్పారు. దేశం కాలుష్య రహిత ఇంధన ప్రయాణంలో గ్రీన్ అమ్మోనియా ప్రాజెక్టు ఒక కీలక మైలురాయిగా నిలవనుందని ఆయన అభిప్రాయపడ్డారు.

శనివారం కాకినాడ వాకలపూడిలో గౌరవ ముఖ్యమంత్రి చంద్రబాబు నాయుడు, రాష్ట్ర బీజేపీ అధ్యక్షులు పి.వి.ఎన్. మాధవ్ తో కలిసి AM Green సంస్థ గ్రీన్ అమ్మోనియా–గ్రీన్ హైడ్రోజన్ కాంప్లెక్స్‌కు శంకుస్థాపన చేశారు. ప్లాంట్ నమూనాను పరిశీలించి, యంత్ర పరికరాల పైలాన్‌ను ఆవిష్కరించారు.

అనంతరం జరిగిన సమావేశంలో పవన్ కళ్యాణ్ మాట్లాడుతూ, బలమైన సంకల్పం ఉంటే ఏదైనా సాధించవచ్చని గ్రీన్ కో వ్యవస్థాపకులు చలమలశెట్టి అనిల్ నిరూపించారని అన్నారు. అనేక కష్టనష్టాలను ఎదుర్కొని ఏఎం గ్రీన్ సంస్థను ఈ స్థాయికి తీసుకువచ్చారని ప్రశంసించారు.

కాకినాడలో 495 ఎకరాల విస్తీర్ణంలో ఈ ప్రాజెక్టు ఏర్పాటు కానుండగా, సంవత్సరానికి 1.5 మిలియన్ మెట్రిక్ టన్నుల గ్రీన్ అమ్మోనియా ఉత్పత్తి లక్ష్యంగా పెట్టుకున్నట్లు తెలిపారు. రూ.15,600 కోట్ల పెట్టుబడితో ప్రారంభమవుతున్న ఈ ప్రాజెక్టు ద్వారా సుమారు 8 బిలియన్ డాలర్ల విలువైన ఉత్పాదక ఇంధన పెట్టుబడులు రానున్నాయని చెప్పారు.

2027 చివరి నాటికి తొలి దశ కమిషనింగ్ లక్ష్యంగా, పునరుత్పాదక ఇంధన ఆధారిత శుద్ధ ఇంధన కేంద్రంగా ఈ ప్రాజెక్టు రూపుదిద్దుకోనుందని తెలిపారు. నిర్మాణ దశలో సుమారు 8,000 మందికి, ఆపరేషన్ దశలో సుమారు 1,500 మందికి ప్రత్యక్ష ఉపాధి కల్పించడంతో పాటు, పరోక్షంగా వేలాది మందికి దీర్ఘకాల ఉపాధి అవకాశాలు ఈ ప్రాజెక్టు సృష్టిస్తుందని పవన్ కళ్యాణ్ వివరించారు. ఈ ప్రాజెక్టు విజయవంతం కావాలని మనస్ఫూర్తిగా ఆకాంక్షిస్తున్నట్లు తెలిపారు.