‘డోరతి’ ఓటీటీలోకి వచ్చేది ఎప్పుడంటే?

కీర్తి సురేశ్, సనంత్, రిషికాంత్ కీలక పాత్రల్లో నటించిన ‘డోరతి’ చిత్రానికి కార్తిక్ సుబ్బరాజ్ దర్శకత్వం వహించారు. అక్టోబర్ 2న థియేటర్లలో విడుదలైన ఈ సినిమా ఇప్పుడు ఓటీటీ ప్రేక్షకులను అలరించేందుకు సిద్ధమైంది. అక్టోబర్ 23 నుంచి నెట్‌ఫ్లిక్స్‌లో స్ట్రీమింగ్ కానున్నట్లు సంస్థ అధికారిక పోస్టర్ ద్వారా వెల్లడించింది. 1990ల కాలం నాటి గ్రామీణ తమిళనాడు నేపథ్యంలో సాగే ఈ చిత్రం స్నేహం, వ్యక్తిత్వం, సామాజిక వివక్ష, లింగపరమైన అంచనాల మధ్య వ్యక్తులు ఎదుర్కొనే భావోద్వేగ సంఘర్షణలను ప్రధానంగా చూపిస్తుంది.

కథలో సుబ్బు (సనంత్), కార్తి (రిషికాంత్) చిన్నప్పటి నుంచి ప్రాణ స్నేహితులు. గొడవలకు అలవాటు పడిన వీరిద్దరూ పెద్దయ్యాక కూడా అదే తరహా జీవితాన్ని కొనసాగిస్తుంటారు. అయితే, వయసు పెరిగేకొద్దీ సుబ్బు తనలోని స్త్రీ లక్షణాలను గుర్తించినప్పటికీ, పురుషాధిక్య సమాజం నుంచి అవమానాలు ఎదురవుతాయనే భయంతో తన భావాలను బయటపెట్టలేకపోతాడు. డోరతి (కీర్తి సురేశ్) అతని వదినగా ఇంట్లోకి వచ్చిన తర్వాత ఆమెతో సుబ్బుకు గాఢమైన అనుబంధం ఏర్పడుతుంది. అనూహ్యంగా ఆమె మరణించడంతో సుబ్బు జీవితంలో కీలక మార్పు చోటుచేసుకుంటుంది. అతను తీసుకున్న నిర్ణయం సుబ్బు, కార్తి జీవితాల్లో కొత్త సమస్యలకు దారితీసి, వారి స్నేహాన్ని వైరంగా మారుస్తుంది. వ్యక్తిత్వం, స్నేహం, దుఃఖం, సామాజిక ఒత్తిళ్లు మనుషుల జీవితాలను ఎలా ప్రభావితం చేస్తాయన్నది ఈ చిత్రంలో ప్రధానంగా ఆవిష్కరించారు.