విజయ్ దేవరకొండ కొత్త సినిమా అనౌన్స్... మైథలాజికల్ యూనివర్స్‌లో భారీ ప్రాజెక్ట్

టాలీవుడ్ హీరో విజయ్ దేవరకొండ కొత్త ప్రాజెక్ట్‌ను ప్రకటించారు. శౌర్యువ్ దర్శకత్వంలో తెరకెక్కబోయే ఈ సినిమాకు ప్రస్తుతం వీడీ శౌర్యువ్ అనే వర్కింగ్ టైటిల్‌ను వెల్లడించారు. విడుదల చేసిన పోస్టర్‌లో విజయ్ స్టైలిష్ లుక్‌తో పాటు యోధుడిలా చేతులకు కవచాలు ధరించి కనిపించడం ఆసక్తిని రేకెత్తిస్తోంది. పోస్టర్‌ పై ఉన్న ఇప్పుడు కనిపించే కోపమంతా ఒకప్పటి ప్రేమ అనే లైన్ సినిమా కథపై మరింత కుతూహలం పెంచుతోంది. ఈ చిత్రం మైథలాజికల్ యూనివర్స్ నేపథ్యంలో సాగే గ్లోబల్ స్థాయి కథతో రూపొందనుందని చిత్ర బృందం తెలిపింది. ప్రేక్షకులకు కొత్త అనుభూతిని అందించేలా ప్రత్యేక ప్రపంచాన్ని చూపించాలనే ఉద్దేశంతో ఈ ప్రాజెక్ట్‌ను రూపొందిస్తున్నారు.

సాంకేతికంగా కూడా ఈ సినిమాకు భారీ స్థాయి ఏర్పాట్లు చేస్తున్నారు.హౌస్ అఫ్ ది డ్రాగన్ , ఫాల్లోఉత్ వంటి ప్రాజెక్ట్‌లకు పని చేసిన అలెజాండ్రో మార్టినెజ్ సినిమాటోగ్రాఫర్‌గా పనిచేస్తున్నారు. అలాగే గాడ్స్ అఫ్ ఈజిప్ట్, బాట్మాన్ ఫరెవర్ చిత్రాలకు పని చేసిన ఎరిక్ డస్ట్ర్ వీఎఫ్‌ఎక్స్ సూపర్‌వైజర్‌గా వ్యవహరించనున్నారు. ప్రొడక్షన్ డిజైన్ బాధ్యతలను సురేశ్ సెల్వరాజన్ తీసుకోగా, సంగీతాన్ని హేషమ్ అబ్దుల్ వహాబ్ అందించనున్నారు. ఈ చిత్రాన్ని వైరా ఎంటర్‌టైన్‌మెంట్స్ నిర్మిస్తోంది.