భారీ ప్రాజెక్ట్ రామాయణంలో భాగమైన టాలీవుడ్ సంగీత దర్శకుడు

టాలీవుడ్ సంగీత దర్శకుడు, నటుడు దేవిశ్రీ ప్రసాద్ రాబోయే భారీ చిత్రం ‘రామాయణం’ గురించి ఆసక్తికరమైన అప్‌డేట్‌ను వెల్లడించారు. ఈ సినిమాలో యశ్ పోషిస్తున్న రావణుడి పాత్రపై చిత్రీకరించిన ‘రావణ తాండవం’ పాటకు తాను గాత్రాన్ని అందించినట్లు సోషల్ మీడియా వేదికగా తెలిపారు. ఇంత ప్రతిష్ఠాత్మకమైన ప్రాజెక్ట్‌లో భాగమైనందుకు సంతోషంగా ఉందని వెల్లడించారు. ఈ వార్తతో డీఎస్పీ అభిమానుల్లో ఉత్సాహం నెలకొంది. తమిళ వెర్షన్‌లో ఇదే పాటను జీవీ ప్రకాశ్ కుమార్ ఆలపించారు. ఇతర భాషల్లో ఈ పాటను ఎవరు పాడారనే వివరాలు ఇంకా తెలియాల్సి ఉంది.

‘రామాయణం’ సినిమాపై రోజురోజుకూ అంచనాలు పెరుగుతున్నాయి. భారతదేశంలోని కొన్ని ప్రాంతాల్లో పరిమితంగా అడ్వాన్స్ బుకింగ్స్ ప్రారంభమైనట్లు సమాచారం. నితేశ్ తివారీ దర్శకత్వం వహిస్తున్న ఈ చిత్రాన్ని నమిత్ మల్హోత్రా, యశ్ భాగస్వామ్యంతో నిర్మిస్తున్నారు. ఇందులో రణ్‌బీర్ కపూర్ శ్రీరాముడిగా, సాయి పల్లవి సీతగా, యశ్ రావణుడిగా కనిపించనున్నారు. భారీ బడ్జెట్‌తో తెరకెక్కుతున్న ఈ చిత్రం 2026 నవంబర్ 5న ప్రపంచవ్యాప్తంగా థియేటర్లలో విడుదల కానుంది. ఈ నేపథ్యంలో సినిమా నుంచి వచ్చే తదుపరి అప్‌డేట్స్‌పై ప్రేక్షకుల్లో ఆసక్తి నెలకొంది.