టైగర్‌ ష్రాఫ్‌ కాల్పుల కేసులో కీలక పరిణామం.. రణ్‌బీర్‌ కపూర్‌ ఇంటి వద్ద రెక్కీ?

బాలీవుడ్‌ నటుడు టైగర్‌ ష్రాఫ్‌ కారుపై కాల్పుల ఘటన దర్యాప్తులో కీలక విషయాలు వెలుగులోకి వస్తున్నాయి. ఈ కేసులో నిందితులుగా అనుమానిస్తున్న షూటర్లు ముంబయిలోని బాంద్రాలో ఉన్న మరో బాలీవుడ్‌ నటుడు రణ్‌బీర్‌ కపూర్‌ నివాసం వద్ద కూడా రెక్కీ నిర్వహించినట్లు పోలీసు వర్గాలు వెల్లడించాయి. నిందితుల కదలికలు, వారి మధ్య సంబంధాలు, దాడి వెనుక ఉన్న వ్యక్తులు, ఆయుధాల సరఫరా వ్యవస్థపై పోలీసులు దర్యాప్తు చేస్తున్నారు. రణ్‌బీర్‌ కపూర్‌ నివాసం వద్ద రెక్కీ నిర్వహించినట్లు వచ్చిన సమాచారం ఈ కేసులో ప్రాధాన్యం సంతరించుకుంది.

అక్టోబర్‌ 18న ముంబయిలోని జుహు ప్రాంతంలో టైగర్‌ ష్రాఫ్‌ కారుపై కాల్పుల ఘటన చోటుచేసుకుంది. ఈ ఘటనకు ఒక రోజు ముందే, అక్టోబర్‌ 17న షూటర్లకు తుపాకులు చేరినట్లు దర్యాప్తులో వెల్లడైనట్లు సమాచారం. ఆయుధాల తరలింపులో బబిత, రాధ అనే ఇద్దరు మహిళలు కీలక పాత్ర పోషించినట్లు పోలీసులు గుర్తించి వారిని అరెస్టు చేశారు. ప్రధాన ఆయుధ సరఫరాదారుగా అనుమానిస్తున్న కునాల్‌.. దిల్లీ రైల్వే స్టేషన్‌లో వారికి ఆయుధాలు అందించినట్లు దర్యాప్తు వర్గాలు తెలిపాయి. ఈ కేసులో ‘డెడ్‌ డ్రాప్‌’ అనే రహస్య పద్ధతిని ఉపయోగించారా అనే కోణంలోనూ పోలీసులు విచారిస్తున్నారు. ఈ పద్ధతిలో ముందుగా నిర్ణయించిన ప్రదేశంలో వస్తువులను ఉంచి, వాటిని తీసుకోవాల్సిన వ్యక్తికి ఆ ప్రదేశం వివరాలను రహస్యంగా చేరవేస్తారు. దీంతో ఇరు పక్షాలు నేరుగా కలుసుకోవాల్సిన అవసరం ఉండదు.