బుల్లితెరకు మళ్లీ రాబోతున్న ఈ స్టార్ హీరోయిన్!

‘చిన్నారి పెళ్లికూతురు’ సీరియల్‌తో దేశవ్యాప్తంగా గుర్తింపు తెచ్చుకుని, తర్వాత ‘ఉయ్యాలా జంపాల’ వంటి సినిమాలతో తెలుగు ప్రేక్షకులను ఆకట్టుకున్న అవికా గోర్ మరోసారి వార్తల్లో నిలిచారు. వివాహం తర్వాత కూడా సినిమాల్లో నటిస్తూ, సోషల్ మీడియాలో చురుకుగా ఉంటున్న ఆమె తాజా ఇన్‌స్టాగ్రామ్ పోస్ట్ అభిమానుల్లో ఆసక్తిని రేకెత్తించింది.

తన ప్రయాణం ప్రారంభమైన చోటుకే తిరిగి రావడం ఎంతో అందమైన అనుభూతి అని, అది వెనుకడుగు కాదని అవికా పేర్కొన్నారు. జీవితంలో ఎదుగుదలతో మన మూలాలను కొత్త కోణంలో చూసే అవకాశం వస్తుందని ఆమె చెప్పుకొచ్చారు. అయితే బుల్లితెరపైకి తిరిగి వస్తున్నట్లు అధికారికంగా ప్రకటించకపోయినా, ఆమె వ్యాఖ్యలు టెలివిజన్ రీఎంట్రీకి సంకేతమని అభిమానులు భావిస్తున్నారు.