ప్రదీప్ రంగనాథన్ సినిమాలోకి తరుణ్ భాస్కర్ ఎంట్రీ

నటుడిగా, దర్శకుడిగా గుర్తింపు తెచ్చుకున్న ప్రదీప్ రంగనాథన్ ఇప్పుడు నిర్మాతగా కొత్త ప్రయాణాన్ని ప్రారంభించారు. తన సొంత నిర్మాణ సంస్థ ‘పీఆర్ షో’ బ్యానర్‌పై ‘పీఆర్‌ఎస్‌01’ అనే వర్కింగ్ టైటిల్‌తో మహిళా ప్రధాన చిత్రాన్ని నిర్మిస్తున్నారు. ఈ సినిమాలో కీలక పాత్ర కోసం తొలుత ‘డ్రాగన్’ దర్శకుడు అశ్వత్ మారిముత్తును అనుకున్నప్పటికీ, ఆయన ఈ ప్రాజెక్ట్ నుంచి తప్పుకున్నట్లు సమాచారం. ఆయన స్థానంలో టాలీవుడ్ దర్శకుడు, నటుడు తరుణ్ భాస్కర్ నటించనున్నట్లు వార్తలు వస్తున్నాయి. ‘ప్రేమలు’తో యువతలో మంచి గుర్తింపు తెచ్చుకున్న మమితా బైజు ఈ చిత్రంలో ప్రధాన పాత్ర పోషించనుంది.

ఈ సినిమాకు మరో ప్రత్యేకత కూడా ఉంది. ప్రదీప్ రంగనాథన్ వద్ద అసిస్టెంట్ డైరెక్టర్లుగా పనిచేసిన ఆరుగురు యువ దర్శకుల బృందం ‘ది ఆల్ఫా యూనిట్’ సంయుక్తంగా ఈ చిత్రానికి దర్శకత్వం వహిస్తోంది. ప్రస్తుతం సంగీత రంగంలో గుర్తింపు పొందుతున్న సాయి అభ్యంకర్ ఈ ప్రాజెక్ట్‌కు సంగీతం అందిస్తున్నారు. కొత్త ప్రతిభను ప్రోత్సహించేలా ప్రదీప్ రంగనాథన్ నిర్మాణ సంస్థను ప్రారంభించడం, యువ దర్శకుల బృందానికి అవకాశం ఇవ్వడం ఆసక్తిని పెంచుతోంది. తరుణ్ భాస్కర్, మమితా బైజు కలయికతో రూపొందుతున్న ఈ చిత్రం గురించి మరిన్ని వివరాల కోసం సినీ అభిమానులు ఎదురుచూస్తున్నారు.