ఈ నెల 26 న విడుదల కానున్న సుడిగాలి సుధీర్ G.O.A.T (గోట్) మూవీ

ప్రముఖ హాస్య నటుడు సుడిగాలి సుధీర్ హీరోగా నటిస్తున్న తాజా చిత్రం G.O.A.T(గోట్) GreatestOfAllTimes అనే ఉపశీర్షికతో రూపొందుతున్న ఈ సినిమాలో దివ్యభారతి హీరోయిన్‌గా నటిస్తోంది. ఈ చిత్రానికి వేదవ్యాస్‌ దర్శకత్వం వహిస్తున్నారు. మహాతేజ క్రియేషన్స్ మరియు జైష్ణవ్ ప్రొడక్షన్స్ సంస్థలు కలిసి ఈ సినిమాను నిర్మిస్తున్నాయి. నిర్మాతగా చంద్రశేఖర్ రెడ్డి మొగుళ్ళ వ్యవహరిస్తున్నారు. ప్రస్తుతం సినిమా నిర్మాణానంతర పనులు జరుగుతున్నాయి. ఈ చిత్రం ఈ నెల 26 న ప్రపంచవ్యాప్తంగా థియేటర్లలో విడుదల కానుంది. ఇప్పటి వరకు విడుదలైన పోస్టర్లు, పాటలు, ఇతర కంటెంట్‌కు మంచి స్పందన లభించింది. త్వరలోనే ట్రైలర్‌ను కూడా విడుదల చేయాలని చిత్రబృందం సిద్ధమవుతోంది.

నిర్మాత మాట్లాడుతూ, ఈ సినిమాను ఎక్కడా రాజీపడకుండా భారీ స్థాయిలో తెరకెక్కిస్తున్నామని చెప్పారు. టెక్నికల్‌గా కూడా సినిమా చాలా మంచి స్థాయిలో ఉంటుందని తెలిపారు. సుడిగాలి సుధీర్ కెరీర్‌లో ఈ చిత్రం ఒక ముఖ్యమైన మైలురాయిగా నిలుస్తుందని ఆయన నమ్మకం వ్యక్తం చేశారు. సినిమా మొత్తం ప్రతి సన్నివేశం ఆకట్టుకునేలా ఉంటుందని, పూర్తి కమర్షియల్ అంశాలతో పాటు నేటి యువతను ఆలోచింపజేసే మంచి సందేశం కూడా ఇందులో ఉంటుందని చెప్పారు. ఈ సినిమా ప్రేక్షకులను తప్పకుండా అలరిస్తుందని చిత్రబృందం విశ్వాసం వ్యక్తం చేస్తోంది.

ఈ చిత్రంలో సుడిగాలి సుధీర్, దివ్యభారతి తో పాటు సర్వధమన్ బెనర్జీ, నితిన్ ప్రసన్న, బ్రహ్మాజీ, పృథ్వీ, ఆడుకాలం నరేష్, రాజేంద్రన్, ఆనంద్ రామరాజ్, చమ్మక్ చంద్ర, పమ్మీ సాయి, నవీన్ నేని తదితరులు ముఖ్య పాత్రల్లో నటిస్తున్నారు. ఈ చిత్రానికి సంగీతం లియోన్ జేమ్స్ అందిస్తుండగా, నేపథ్య సంగీతం మణిశర్మ అందిస్తున్నారు. సినిమాటోగ్రఫీని ర‌సూల్ ఎల్లోర్‌ నిర్వహిస్తున్నారు.