సుదీప్‌ బర్త్‌డే స్పెషల్‌.. ‘దేవరాయ’ టైటిల్‌ టీజర్‌ విడుదల

కన్నడ స్టార్‌ హీరో సుదీప్‌ తెలుగు ప్రేక్షకులకు కూడా సుపరిచితమే. ముఖ్యంగా ‘ఈగ’ చిత్రంలో విలన్‌గా ఆయనకు మంచి గుర్తింపు వచ్చింది. ‘బాహుబలి’, ‘సైరా నరసింహారెడ్డి’ వంటి తెలుగు సినిమాల్లో అతిథి పాత్రల్లోనూ కనిపించారు. ప్రస్తుతం కన్నడ చిత్రాలకే ఎక్కువగా పరిమితమైన సుదీప్‌ పుట్టినరోజు సందర్భంగా ఓ క్రేజీ ప్రాజెక్ట్‌ను ప్రకటించారు. ప్రముఖ నిర్మాణ సంస్థ పీపుల్‌ మీడియా ఫ్యాక్టరీ నిర్మిస్తున్న ఈ చిత్రానికి ‘దేవరాయ’ అనే టైటిల్‌ను ఖరారు చేశారు.

శ్రీకృష్ణదేవరాయల జీవితం ఆధారంగా ఈ సినిమాను తెరకెక్కిస్తున్నట్లు మేకర్స్‌ వెల్లడించారు. ‘హనుమాన్‌’ ఫేమ్‌ గౌరహరి సంగీతం అందించనుండగా, తాజాగా విడుదలైన టైటిల్‌ టీజర్‌ ఆకట్టుకుంది. ఈ సినిమా వచ్చే ఏడాది డిసెంబరులో థియేటర్లలోకి రానున్నట్లు ప్రకటించారు. అయితే దర్శకుడు ఎవరనేది మాత్రం వెల్లడించలేదు. దర్శకుడి ఎంపిక ఇంకా పూర్తికాలేదా, లేక ఉద్దేశపూర్వకంగానే పేరును ప్రకటించలేదా అనే ఆసక్తి నెలకొంది. అలాగే ఇది పాన్‌ ఇండియా చిత్రమా కాదా అన్న దానిపై కూడా మేకర్స్‌ స్పష్టత ఇవ్వలేదు.