పా రంజిత్ సినిమా నుంచి శోభితా దూళిపాళ్లఫస్ట్ లుక్ రిలీజ్

వైవిధ్యమైన పాత్రలను ఎంచుకుంటూ ప్రత్యేక గుర్తింపు తెచ్చుకున్న నటి శోభిత దూళిపాళ్ల మరో కొత్త అవతారంలో ప్రేక్షకులను ఆకట్టుకునేందుకు సిద్ధమవుతున్నారు. దర్శకుడు పా. రంజిత్ తెరకెక్కిస్తున్న సైన్స్ ఫిక్షన్ యాక్షన్ డ్రామా ‘వేట్టువం’ నుంచి విడుదలైన ఆమె ఫస్ట్ లుక్ పోస్టర్ సోషల్ మీడియాలో సంచలనం సృష్టిస్తోంది. ఈ చిత్రంలో శోభిత ఇప్పటివరకు చేయని పవర్‌ఫుల్, ఇంటెన్స్ పాత్రలో కనిపించనున్నట్లు పోస్టర్ స్పష్టంగా సూచిస్తోంది.

పోస్టర్‌లో శోభిత రా అండ్ రస్టిక్ లుక్‌లో కనిపిస్తున్నారు. పూర్తి బ్లాక్ డ్రెస్‌లో, మెడలో ప్రత్యేకమైన లాకెట్‌తో, మేఘాలు కమ్ముకున్న ఆకాశం నేపథ్యంగా ఇటుకల గోడపై నిలబడి ఉన్న ఆమె గంభీరమైన చూపు పాత్ర తీవ్రతను ప్రతిబింబిస్తోంది. నీలం ప్రొడక్షన్స్, లెర్న్ అండ్ టీచ్ ప్రొడక్షన్ సంస్థలు నిర్మిస్తున్న ఈ చిత్రానికి జీవీ ప్రకాష్ కుమార్ సంగీతం అందిస్తున్నారు. ఆర్య, వి.ఆర్. దినేష్ కీలక పాత్రల్లో నటిస్తున్న ఈ సినిమా షూటింగ్ చివరి దశలో ఉండగా, ఆగస్టు తర్వాత విడుదలకు సన్నాహాలు జరుగుతున్నాయి.