ఫెయిల్యూర్స్‌కి భయపడొద్దని విద్యార్థులకు భావోద్వేగంగా చెప్పిన శర్వానంద్

తన తాజా సినిమా బైకర్ ప్రమోషన్లలో శర్వానంద్ బిజీగా ఉన్నారు. ఇండియన్ సినీ చరిత్రలో మొదటి మోటర్ రేసింగ్ నేపథ్య చిత్రం అనే ప్రత్యేకత ఈ సినిమాకు ఉంది. అభిలాష్ రెడ్డి కంకర దర్శకత్వం వహించిన ఈ చిత్రానికోసం శర్వా నాలుగు నెలల్లో 12 కిలోలు తగ్గుతూ కఠినమైన డైట్, వర్కౌట్స్, జిమ్, యోగా చేశాడు.

ప్రమోషన్లలో భాగంగా ఆయన నిన్న ఒక కాలేజ్ ఈవెంట్‌కు హాజరై భావోద్వేగపూర్వకంగా విద్యార్థులను ఉద్దేశించి ప్రసంగించారు. “Rise Above Failures” అనే సందేశాన్ని ఇస్తూ,
“జీవితం కేవలం చదువులు, డిగ్రీలు, డబ్బు గురించే కాదు… అది క్షణాల గురించి. మంచి మనిషిగా ఉండండి, విజయమే మీ వెంట వస్తుంది. తప్పిదాలను అంగీకరించండి, వాటి నుంచి నేర్చుకోండి. జీవితానికి దూరంగా పారిపోవద్దు, డిప్రెషన్‌లో పడిపోవద్దు - ఏదీ శాశ్వతం కాదు,” అన్నారు.

తన ప్రయాణంలో ఎదురైన కష్టాలను కూడా ఆయన నిజాయితీగా పంచుకున్నారు.
“నేను కూడా ఎన్నో ఫెయిల్యూర్స్ చూశాను. మోసపోయాను, వాడబడ్డాను, నొప్పి అనుభవించాను. కానీ ఎప్పుడూ చేతులెత్తలేదు. మళ్లీ లేచాను. నిజమైన హీరో అంటే పడిపోయిన తర్వాత మళ్లీ లేచేవాడు. జీవితమే ఓర్పు, మంచితనం, కష్టపడి పని చేయడం నేర్పుతుంది. ఎప్పుడూ గివ్ అప్ ఇవ్వకండి , బాధ్యతల నుంచి పారిపోవద్దు,” అని చెప్పారు.

తుది సందేశంగా,
“ఇది మీ కథ అయితే, రైటర్ కూడా మీరే కావాలి. జీవితం నాకు నేర్పినది ఇదే. మీరందరూ మీ కథల రచయితలు అవ్వండి, చరిత్ర సృష్టించండి,” అని విద్యార్థులకు ప్రేరణ నింపారు.

శర్వానంద్ ఇచ్చిన మోటివేషన్ అందరిని ఆకట్టుకుంటోంది. ఆయన స్పీచ్ నుంచి క్లిప్‌లు రీల్స్‌గా సోషల్ మీడియాలో వైరల్ అవుతున్నాయి. UV క్రియేషన్స్ నిర్మించిన బైకర్ డిసెంబర్ 6న విడుదల కానుంది.