ఆది విజయంపై తండ్రి సాయి కుమార్ ఎమోషనల్ కామెంట్స్

తన కుమారుడు, నటుడు ఆది విజయంపై హర్షం వ్యక్తం చేశారు సాయి కుమార్. ఆది నటించిన ‘శంబాల’ సక్సెస్‌కు ఎమోషనల్‌ అయినట్లు పేర్కొన్నారు. ఈ సినిమా గురువారం విడుదలైన సందర్భంగా నిర్వహించిన ప్రెస్‌మీట్‌లో మాట్లాడారు.

‘‘ఇది నాకు ఎమోషనల్ డే. ఆది తొలి సినిమా ‘ప్రేమ కావాలి’ ఫస్ట్‌ డే ఫస్ట్‌ షో విజయనగరంలో చూశాక పైడితల్లి అమ్మవారిని దర్శించుకున్నా. ఇప్పుడు ‘శంబాల’కూ హౌస్‌ఫుల్‌ బోర్డులు కనిపిస్తున్నాయి. నేను ఈ మూవీ లోగో ఉన్న టీషర్టు వేసుకుని, చిన్న పిల్లాడిలా హైదరాబాద్‌లోని పలు థియేటర్లకు వెళ్లా. అక్కడ తెలిసిన వారంతా ‘సర్‌.. అబ్బాయి విజయం సాధించాడు’ అంటుంటే ఎంతో ఆనందపడ్డా. ఓ థియేటర్‌ వద్ద ఎమోషనల్‌ అయ్యా. ఆది సక్సెస్‌ కోసం అందరం ఎదురుచూశాం. మధ్యలో కొన్ని మంచి సినిమాల్లో నటించినా ఆశించిన స్థాయిలో ఫలితం దక్కలేదు. విడుదలైన అన్ని ప్రాంతాల్లోనూ ‘శంబాల’ విజయవంతంగా ప్రదర్శితమవుతోంది. విషెస్‌ మెసేజ్‌లు మాకు ఇంకా వస్తూనే ఉన్నాయి. కొందరు తమదైన శైలిలో రివ్యూలు పంపిస్తున్నారు. ఇందులోని పలు అంశాల గురించి చర్చించుకుంటున్నారు’’ అని సాయికుమార్‌ పేర్కొన్నారు.