రష్యా-ఉక్రెయిన్ యుద్ధం.. మోహన్‌లాల్ కొత్త సినిమాకు అదే స్ఫూర్తి

మలయాళ సూపర్‌స్టార్‌ మోహన్‌లాల్ నటిస్తున్న 367వ చిత్రానికి ‘ఆపరేషన్ గంగా’ అనే టైటిల్‌ను ఖరారు చేశారు. ‘మెప్పడియాన్’ చిత్రంతో జాతీయ అవార్డు అందుకున్న దర్శకుడు విష్ణు మోహన్ ఈ భారీ ప్రాజెక్ట్‌ను తెరకెక్కిస్తున్నారు. రష్యా-ఉక్రెయిన్ యుద్ధ సమయంలో ఉక్రెయిన్‌లో చిక్కుకున్న భారతీయులను సురక్షితంగా స్వదేశానికి తీసుకురావడానికి చేపట్టిన భారత ప్రభుత్వ తరలింపు కార్యక్రమం ‘ఆపరేషన్ గంగా’ స్ఫూర్తిగా ఈ సినిమా రూపొందుతోంది. అయితే ఇది సాధారణ ఆర్మీ నేపథ్య చిత్రం కాదని, పలు వాస్తవ సంఘటనల ఆధారంగా కథను రూపొందిస్తున్నట్లు దర్శకుడు గతంలో వెల్లడించారు.

మోహన్‌లాల్‌తో పాటు అర్జున్ రాంపాల్, భాగ్యశ్రీ బోర్సే, పార్థిబన్, ఆదిల్ హుస్సేన్ తదితరులు కీలక పాత్రల్లో నటిస్తున్నారు. ‘పుష్ప’ చిత్రాలకు పనిచేసిన మిరోస్లావ్ కుబా బ్రోజెక్ ఛాయాగ్రహణం అందిస్తుండగా, ‘కిల్’, ‘ధురంధర్’ చిత్రాలకు పనిచేసిన సీ యంగ్ ఓహ్ యాక్షన్ కొరియోగ్రఫీ చేస్తున్నారు. శాశ్వత్ సచ్‌దేవ్ సంగీతం అందిస్తున్నారు. శ్రీ గోకులం మూవీస్ పతాకంపై గోకులం గోపాలన్ నిర్మిస్తున్న ఈ చిత్ర షూటింగ్ ప్రస్తుతం జార్జియాలో కొనసాగుతోంది.