50 లక్షల బడ్జెట్, కలెక్షన్స్ 100కోట్లు, వసూళ్లు లో దూసుకు పోతున్న గుజరాత్ ‘లాలో' మూవీ!

అతి తక్కువ బడ్జెట్‌ తో నిర్మించిన ఒక చిన్న సినిమా ఇప్పుడు గుజరాత్ చిత్ర పరిశ్రమ చరిత్ర లోనే పెద్ద రికార్డులను సృష్టిస్తోంది. ‘లాలో – కృష్ణ సదా సహాయతే’ అనే సినిమా కేవలం రూ.50 లక్షలతో నిర్మించబడినా, ప్రచారానికి పెద్ద ఏర్పాట్లు లేకపోయినా, కథ శక్తి ఒక్కటే దీనిని బాక్సాఫీస్ వద్ద ముందుకు నడిపిస్తోంది. ఈ చిత్రం రూ.100 కోట్ల మార్క్ వైపు వేగంగా దూసుకెళ్తున్నట్లు జాతీయ మీడియా పేర్కొంది.

ఏడు వారాల క్రితం ఎటువంటి అంచనాలు లేకుండా థియేటర్లలో విడుదలైన ఈ సినిమాకు మొదటి రోజుల్లో పెద్దగా స్పందన రాలేదు. మొదటి వారంలో కేవలం రూ.26 లక్షలు మాత్రమే వసూలయ్యాయి. తరువాతి రెండు వారాలు కూడా పెద్దగా మార్పు కనిపించలేదు. కానీ ప్రేక్షకులు ‘మాట మామూలు కాదు’ అన్నట్టుగా కథ బలం నోటా నోటా వ్యాపించడంతో చిత్రం నాలుగో వారం నుంచి ఊపందుకుంది.

ఆరో వారం పూర్తయ్యే సరికి సినిమా రూ.70 కోట్లకు పైగా రాబట్టింది. ఇప్పుడు ఏడో వారం కూడా విజయవంతంగా ప్రదర్శించబడుతూ, రూ.100 కోట్ల క్లబ్ వైపు పరుగులు పెడుతోంది. ఇప్పటివరకు గుజరాతీ భాషలో అత్యధిక వసూళ్లు చేసిన ‘చాల్ జీవీ లాయియే’ సినిమా రూ.50 కోట్లు అందుకుంది. ‘లాలో’ ఈ రికార్డును దాటి మొదటి రూ.100 కోట్ల గుజరాతీ సినిమాగా నిలవబోతోంది.

అంకిత్ సఖియా దర్శకత్వం వహించిన ఈ చిత్రంలో రీవా రచ్, శ్రుహద్ గోస్వామి, కరణ్ జోషి, మిష్టి కడేచా తదితరులు నటించారు. భారీ ఆదరణ పొందిన ఈ సినిమా నవంబర్ 28 న దేశవ్యాప్త విడుదలకు సిద్ధమవుతోంది. హిందీ డబ్బింగ్ కూడా పూర్తయిందని సమాచారం.

సినిమాలో లాలో ఒక రిక్షా డ్రైవర్. తన గతం నుండి వచ్చిన బాధలతో అతడు ఎప్పుడూ కలతతో జీవిస్తుంటాడు. ఒక రోజు అనుకోకుండా ఫామ్‌హౌస్‌లో చిక్కుకుపోతాడు. అక్కడ అతనికి కృష్ణుడి లీలలు ప్రత్యక్షమవుతున్నట్టుగా భావన కలుగుతుంది. ఆ ఆధ్యాత్మిక అనుభూతి అతని మనసులో మార్పుకు దారితీస్తుంది. గతం నుంచి బయటపడుతూ, ముక్తి మార్గం వైపు అడుగులు వేస్తాడు. చివరికి కొత్త ఆశలతో జీవితం వైపు తిరిగి ప్రయాణించడం ప్రారంభిస్తాడు.