రవితేజ కొత్త సినిమా టైటిల్ వచ్చేసింది..

మాస్ మహారాజా రవితేజ, దర్శకుడు వివేక్ ఆత్రేయ కాంబినేషన్‌లో తెరకెక్కుతున్న క్రైమ్ కామెడీ చిత్రానికి ‘తులాభారం’ అనే టైటిల్‌ను ఖరారు చేశారు. సాధారణ ఫస్ట్‌లుక్ పోస్టర్‌ను విడుదల చేయకుండా, చిత్రబృందం మొత్తం కనిపించే సరదా వీడియోతో టైటిల్‌ను పరిచయం చేశారు. ఈ వీడియోలో సినిమా పేరును నిర్ణయించేందుకు నటీనటులంతా కలిసి చర్చించుకుంటూ, తమకు నచ్చిన టైటిళ్లు, జానర్లను సూచిస్తూ సందడి చేశారు. చివరకు క్రైమ్, కామెడీ, రొమాన్స్, ఎమోషన్స్ కలగలిసిన కథకు ‘తులాభారం’ అనే పేరును ఖరారు చేశారు. ఈ సందర్భంగా రవితేజకు ‘క్రైమ్ మహారాజా’ అనే సరదా ట్యాగ్‌ను కూడా పరిచయం చేశారు.

ఈ వీడియో ద్వారా సినిమాలోని పలు పాత్రల పేర్లను కూడా వెల్లడించారు. అనిల్ కరెళ్ల జడేజాగా, రవి ఆంథోనీ రాబిన్‌గా, తరుణ్ భాస్కర్ దేవరాజ్‌గా, జేడీ చక్రవర్తి శివాజీ రావుగా కనిపించనున్నారు. ప్రియాంక మోహన్ కృష్ణవేణిగా, అనస్వర రాజన్ సౌండ్‌గా నటిస్తున్నారు. అయితే, రవితేజ పాత్ర పేరు మాత్రం ఇంకా వెల్లడించలేదు. బ్రిడ్జ్ ప్రొడక్షన్స్ నిర్మిస్తున్న ఈ సినిమా రెగ్యులర్ షూటింగ్ అక్టోబర్ 17న ప్రారంభం కానుంది. వివేక్ సాగర్ సంగీతం అందిస్తుండగా, తేనీ ఈశ్వర్ సినిమాటోగ్రఫీ బాధ్యతలు నిర్వహిస్తున్నారు. ఈ చిత్రానికి సంబంధించిన మరిన్ని వివరాలను త్వరలో వెల్లడించనున్నారు.